En Weihnachtsbreef an de Kende

Leev Kende,

Düss Johr mööt e Weihnachte ens ohne mech feiere, denn ech wearen üwwe die Feiedääch vereise. Ech mööch ens et Chresfess ob meng Aat feiere. De Bapa well net metfahre, er meint Weihnachte mööt me deheim sen. Ihr könnt jo wie jedes Johr bei oos heim kunn. Ihr wesst jo ous de letzte Johre wie bei oos Weihnachte jefeiet wiet on dat schaffte bestimmp och ohne mech. Ech han noch kein Vorbereitunge jetroffe, do könnt e all die joot Rotschlääch die ihr mir jedes Johr füe Esse on Drenke jejenn hat, all selefs ousprobiere.

Die Zimmere füe ze Schlofe han ech suweit objeröümp. Die Jästebette die ech emme von Schmitze newwenaan erüwwe jeschlepp han, könnt e ööch widde holle. De Bettwösch dofüe han ech owwe en oosem Schlofzemme füe ööch parat jelaach. De Bette ze bezehje es füe ööch jo nue en Klacks.

Füe et Fessesse füe die Feiedääch well ech ööch kein Vüeschrifte maache, deshalb han ech och noch nix enjekauf. Die Menge die ihr füe die veir Daach füe ööch drei Famillile broucht, mööt e dann vüeher ousräächene. Met mengem kleine Auto moot ech imme e paamol bei Edeka on Aldi fahre, äwwe ihr könnt et jo met ööje decke Limusine en einem Rötsch schaffe. Ihr könnt och die schwer Jetränkekeste besse en et Auto pöngele wie ech. Äwwe denkt draan, dat de Bapa nue Kölsch maach on de Olaf nue Cola, de Hannes drenk nue Fanta on ööch Puute drenken nue der Kakau ous demm Biolade ous de Stadt. Do es et imme arch voll on me kann och net parke, äwwe ihr hat jo Urlaub on vill Zeit.

Och wisst ihr selevs am beste watt ihr broucht.

Vleech wollt e jo och enz ous esse john, dann broucht e noher net ze spoöle, de Spölmaschin es nämlech kapott on de Bapa hät et net jeschaff se ze flicke. Wenn e deheim esse wollt, könnt e ruhich dat jode Porzeleng ous em Wunnzemmeschrank nenn. Ech han jetz en Quell wo ech dat Jeschier wat de Kende zedeppert han, nohbestelle kann. Der Kataloch met de Preisliss leit em Wunnzimmeschrank en de öwweschte Schublaad.

Wenn jet ze Bruch jeit könnt ihr et Jeld ruhich dobei läje.

Weihnachtsplätzje han ech düss Johr kein jebacke, ihr könnt jo füe ööch en Doos Plätzje metbrenge, de Bapa daasch jo kein esse wäjen sengem Zucke.

Denkt och aan de Weihnachtsbaum. Ech sen nemmi dozo kunn eine ze kaufe, Doch der Tranzport es füe ööch mem Auto seche einfache wie füe mech mem Fahrad. De Chrisbaumstände on de Kurrele stohn em Kelle newwisch de Jromperekess. Neft äwwe die elektrische Keaze, denn die Brandflecke vom letzte Johr seiht me emme noch. Die Pute wollen jo seche widde em Wunnzemme mem Ball spille wenn ihr füe de Klotz setzt.

Fleech joht e jo düss Johr och ens met de Kende en de Chrissmett, dat woa jo at emme menge Wunsch, äwwe ihr fond et altmodesch on allein woll ech net em Döüstere en de Kerech john.

Wat me Sorch määt, es ööje iwije Disput üwwe de Kendeäzijung on wer von ööch et meiste Jeld hät. De Bapa jeiht jo emme laufe bei ööjem loute Jezänks. Am beste bleiv jede von ööch bei senge eijene Meinung, em Bapa zeleev.

Ihr frocht ööch seche woher ech dat Jeld füe die Reis han. Ech han jo et Johr üwwe emme dat Geld wat ech üwwerech hat füe ööch Jeschenke zeröck jelaach, doch en de letzte Johre han ech nie ööje Geschmack jetroffe, on ihr hat noh Weihnachte alles widde ömjetousch. Do han ech jedaach, ihr däät besse die Jutschein die ihr füe mech besorch hat, füe ööch selvs enlüüse on ööch dat kaufe wat ööch jefällt, dann fällt och die Ömtouschaktion noher fott. Üwwe dat Hemb on die Krawatt wiet ööje Bapa sech wie jedes Johr freue, obwohl e koum Jelejenheit hät et aanzedon, mir john jo nirjens mi hin.

Eh ihr widde heim fahrt brengt alles en der Zustand denne aanjetroffe hat wie ihr kunn set. De Bette avzehje, et Bettzöüsch wösche, de Jästebette widde bei Schmitze brenge on e Blomeströüsje als Dankeschön net vejesse. De Staubsaure, de Botzeime on de Botzlompe sen em Schränkche onnech de Trepp.

De Weihnachtsbaum könnt e och widde avschmücke on entsorje, denn bes ech em Januar zeröck sen es et ze spät. Wo die Sammelstell es, könnt e en de Zeidung nohkicke.

Jetz moß ech Schluss maache, sons kunn ech ze spät an de Zuch. Wenn ech em Januar widde do sen, könnt e me jo vezelle wie et woa.

Ech wünschen ööch schön Feiedääch on jode Rötsch en et neue Johr,

Ööch Mam

Margret Nischalke