Dem König auf der Spur 2

Fritze-Vedder:

Miele, schkön dat dou glijk kummen konntest! Dou bist je ganz hinger´em Ohm!

Miele-Tante:

Jo Fritze, wat is dann laus, is dij wuot passeert?

Fritze-Vedder:

Nee, äbber ick habbe doch en ganz wichtigen Anruf am Telefone gekricht. Wij mottet moh do hingene rümme gohn, boh se am buggen sit!

Miele-Tante:

Wij, schkonn widder noh´m Richlipper?

Fritze-Vedder:

Nää, nach widder! Noh Schkeipes Eckart! Do hiätt enner gesiächt, wij mössten do moh kucken, de mächte olle sijne Baime aff. Un de Hecke un de Buschkasie!

Miele-Tante:

Wij will dann de Eckart dat olles schaffen? De hiätt doch gar kinne Tijd wägen diäm ganzen Frijschkeetensgedönze!

Fritze-Vedder:

Do hiätt mij äbber mijne stille Post gesiächt, he hädde genau gesehen wij de Markus Wilke mit diäm Eckart sijner Frugge, em Sabine, im Huobbe gestohn hiätt un se hat ganz wööste akkedeert wilke Baime nou nit maih stohnblijben dröfften dat se Platz fürr´t Anträäden hat.

Miele-Tante:

Jo wann dat so is, dann glaibe ick doch sicker dat de Eckart Künnich wäärt. Getz is he doch auck ganz uobbene im Vürrstand von der Schkützengilde un hiätt wuott te sägene, dann kann he auck nach widder upstijgen!

Fritze-Vedder:

Getz frooge ick mick bloß, boh dat ganze afgemachte Holt hinne kümmet?

Miele-Tante:

Dat kann ick dij sägen! Dat hüöllt sick de Küthen Bernd. De is doch getz Rentner un maaket in Holt. De mott doch getz olle Mannslöüde mit Holt-Schwerteren un Holtflinten outrüsten, de richtigen Schwertere un Gewehre sitt doch getz verbuodden. Un sijn wilden Holt-Goul fürr de Ritterspille, de Hektor, de brouket auck nijje Fööte.

Fritze-Vedder:

Un wat maket he mit diänn Resten un diänn kleenen Ästen?

Miele-Tante:

No, Atzventzkräntze un lauter so kleenet Töüch fürr´n Weihnachtsmarket! Doh will he doch auck graut instijgen.

Fritze-Vedder:

Jo, dat mach wuoll sijn. Äbber boh wij grade bijm Handwerke sit – hiäste dann middegekricht, dat bij Fahlen in der allen Schmitte auck schwoor wuot laus is?

Miele-Tante:

Ick habbe´t gehoort, un do habbe ick gedacht, se wöhren doh drinne am Göüle beschlohen!

Fritze-Vedder:

Nä, ick sij doch so niggeschkierich, un dann habbe ick moh ter Dööre ringekucht. Un do wohr de Fahlen Karlheinz tegange, un de maket fürr de ganze Lanzengarde düsse niggen Bauhnenstangen. Ick dachte irs, dat wöhren so Dingere für de Daakrinne räine te maaken, äbber dat sallt wuoll nigge Lanzen sijn.

Miele-Tante:

Ach, Lanzen währt dat! Ick dachte, so lange wij he schkonn kloppet, dat währt ganze Rüstungen!

Fritze-Vedder:

Nä, äbber de Karlheinz kann dat. De lätt auck üöbber Frijschkeeten de Dööre von der Wirkstelle uppe. Un wenn sick dann enner de Rüstunge verbeult hiätt, kann he se glijk widder richten looten.

Miele-Tante:

Dann sehe ick se getz schkonn olle an Frijschkeeten de Hüfte runder in ner langen Schlange stohn!

Un wann änner von unsen Läseren ´n nijet Gerüchte uppschnappet, dann sall he mo glijk de Telefonnummere 495 anroopen un dat vertellen, un dann konnt se´t olle nächste Wiäcke hij lääsen!