Dei Gesicht

von Relinde Niederländer

Ich gugg da gääre ins Gesicht,

es iss ma vetraut, dei Gesicht,

fascht wie e Lääsebuch.

Ich siehn, wenn´s da gut geht,

ich siehn, wenn de grääzisch bischt,

awwer ich siehn aa,

wenn de schummele duuscht.

Unn wenn noo so langer Zeit

immer noch dieselwe Aue

mich wärme,

dann wääß ich,

warum ich dich gääre hann.

Unn die paar Runzelscha,

die sich drummerumm geschlich hann,

gäwwe ma Sicherhäät.