Frie´er wär ich alt geween

von Relinde Niederländer

Neilisch hat jemand zu ma gesaat: „Ma muss immer vorwärts gugge, nett riggwärts.“ Do iss ma schlaachaadisch in de Sinn komm: Ja, wo gugg ich dann do noch groß hien, was iss bei meer noch se siehn, wenn ich vorwärts gugge? Dobei hann ich das frie´er selbscht gesaat: Awwer heit? Kaum iss Neijohr rumm, iss schunn widder Silveschder. In de Juchend hat ma nett erwaade kenne, bis ma älder woor iss, weil ma gemennt hat, ma kennt dann mache, was ma will. Na ja, ma hat´s halt gemennt. Vegesse ma´s, es iss erumm. Das Wort Selbschtvewirklischung hat´s domools fa uns Fraue gar nett gäbb.

Awwer jetzt zu heit. Heit bin ich alt. Nää, nadeerlich nett, ich geheere zu de äldere Generation. Alt heert sich jo furchtbar an. Ich bin Rentnerin. Allerdings noor noch uffem Babier, ansonschde bin ich Seniorin, Silver Agerin odder Gold Agerin, so genau wääß ich de Unnerschied nett. Best Agerin, hann ich gelääs, iss ma zwische 50 unn 65, also do bin ich driwwernaus. Was frie´er mool e Rentnerverein, iss heit e Age Company mett Greyhopper. Scheen!

So wie die Alde vunn frie´er lääwe meer tatsächlich nimmi. Unn wenn ma nett betribbst noo vorwärts gugge, hann ma doch eigentlich noch e ganz erträächlichi Zeit. Unser Ablaufdadumm hat sich bekanntlich velängert, meer sinn Späteinsteiger fa all meechlische Kurse an de Volkshochschuul, meer mache Gehirnjogging unn Senioredisco im Wasser, meer fahre in Urlaub unn mache Kreizfahrde. Fa se Esse gäbbts iwwerall Biffees, do kenne ma uns bis zum Salat aus gliggliche Gelleriewe aussuche, was ma noch vetraan odder gugge, dass ma nix mett Krimmele esse, die dann unner de Prothese drigge dääde. Appropo Prothese, manche hann das Gligg unn sinn noch se zwett, do kenne dann noch naachts die Zähn in Wassergläser ganz vetraut näwernanner schdehn. Uff die Figur brauch ma nimmi so se achde, ob veheirad odder nett. Was sellde do noch in drei Minudde alle paar Monade aa noch groß an Kalorie vebrennt werre.

Ich hann meer jeedefalls vorgenomm, jeede Daa so gut se lääwe, wie ich noor kann unn nett vorwärts se gugge, zuminnescht nett zeitlich. Ich gugge noor noch räumlich vorwärts, das hääßt, wohin ich trääde, um nett se falle. Vorsichtshalwer hann ich meer e Paar Gesundheits-Senioreschuh, extra breit, zugeleet. Also so ebbes Bequemes hann ich in meim Lääwe noch nett gehatt.

Ich fahre sogar noch Audo unn stelle das in Zukunft, wie viel annere das aa mache, uff zwää Parkplätz sicher ab.

Fahr ich uff die Audobahn unn hann die Ufffahrt geschafft, hann ich kenn Probleme meeh. Mei Audo muss uff de Audobahn jo minneschdens 60 Schdunnekilomeeder fahre kenne, das schafft´s schbielend. So krien ich aa nie e Prodokoll bei Abschdandsmessunge unn schaffe´s, vor jedem Schdau rechtzeidisch se bremse. Um de Schdau hinner meer kimmer ich mich nett, die kenne jo iwwerhole, wenn se wolle.

Iwwerischens, fa Geld se schbare, hann ich meer vorgenomm, Geschengge fa Goldene Hochzeide unn hohe Geburtsdaache erscht korz vorhäär se kaafe, ma wääß jo nie. Sunscht hätt ich jo noor widder unneedisch no vorne geguggt.