Mudderdaa

von Relinde Niederländer

De Daa, wo ma die Mudder ehrd,

so hann ich´s schunn als Kind gelehrd,

an denne muss ma dengge.

Am Sunndaa, do iss Mudderdaa,

du waadschd uff mich, das iss ma klar,

ich wääs, willschd kenn Geschengge.

Ich bin gää 12 Uhr pingdlisch doo,

mei Freindin kommd mett, abbroboo,

duuschd dich memm Esse rischde.

Ich war die leddschd Zeit viel im Schdress,

do hann ich kaum se Midda gess,

uff Lamm hädd ich Gelischde.

Ich frei mich uff de Mudderdaa

unn du, das wääs ich, freischd dich aa,

mei Zeit iss zwar bemesse.

Unn falld deer´s Koche langsam schwäär,

so iss das aa kenn groß Affäär,

dann gehschd hald mett uns esse.

Ab dsirga zwee Uhr missde´ma dann...,

weil meer denoo Termine hann,

ich hoff, s´duud dich nett schdeere.

Ich werr´ jo, Mudder, das iss klar,

s´iss schließlisch jeed Johr Mudderdaa,

dich näggschd Johr widder ehre.

Info

Der Beitrag erhielt den 3. Platz beim Mundartwettbewerb Dannstadter Höhe 2005