Morjns im Bad!

von Relinde Niederländer

Ich gugg in de Schbichel, bin grad aus´em Bett,

was, ich soll das sinn, ich fass´es nett!

Vegrummbelt, vegrääzt, veschloof unn vequeer,

es muss jetzt e eiskalder Wäschlummbe häär,

Es sinn aa schunn widder die Runnsele doo,

in Dreierreih iwwer die Schderrn gezoo.

Mei Hoor, Mensch de Ansatz, er guggt widder raus,

schdrahlt groo dorch die Geeschend, sieht ferchderlich aus!

Ich war mool naduurblond, Mensch, lang, lang iss häär,

mei Hoor brauche Faab, ich muss zum Frisseer.

Mei Dobbelkinn hängt, wie kann ich´s veschdegge,

ee kleen bissje geht´s, wenn ich de Kobb ganz hoch schdregge.

Doch dann duun sich Plissee am Hals bressendeere,

3 Halskedde sinn needisch, um die se kascheere.

Unn wie iss e Buuse, der hängt, se vejinge,

ma queelt sich, duut sich in e Panzer rinnzwinge,

ma schnallt ne no owwe, die Obdigg muss gligge,

doch das Ding schneert emm ab, duut de ganze Daa drigge.

Unn´s Schlimmschde vunn allem, de tägliche Schregg,

de Schritt uff die Woo, de Schbegg der misst wegg.

Das misst´er seit Johre, ich wääß, was ich saan,

ich bin an demm Thema mei Läwe lang draan.

So schdehn ich am Morje betribbst in meim Bad,

betracht in dem Schbichel mei granndisch Fassad.

Do teens nääwa meer, ganz freehlich unn frisch:

„Was däat ich noor mache, mei Schatz, ohne dich!“

Was hann meer doch heit fa e herrlicher Daa,

ich lach in de Schbichel, unn scheen bin ich aa!