Ich schdehn immer an de verkehrt Kass

von Relinde Niederländer

Ich kann mache, was ich will, ich schdehn im Supermarkt immer an de verkehrt Kass. Warum das so iss, komm ich eenfach nett dehinna.

Ma muss jo geleschentlich im Supermarkt inkaafe, weil ma beim Aldi nett alles kriet unn ab unn zu will ma jo aa mool e anneri Sort Käs esse odder aa mool e Ingwerworzel kaafe. Apropoo Aldi. Also, dort an de Kass, das iss e ganz besonneres Erlebnis. In demm Moment, wo ma an die Kass kommt, iss eiserschdi Konzentration erforderlich, ma muss sei körbereigener Turbo inschalle, ob ma will odder nett. Falls ma jemools Joga odder autogenes Training gemacht hat, dort muss ma´s sofort vegesse. Wenn ma iwwer sechzisch iss, kann ma sich eichentlich noor noch se zwett hinwaache, eener alleen werd mett dieser Siduadsjoon ansonschde kaum noch ferdisch Die Kasseererin schiebt die Ware im Akkordtembo iwwer de Scanner, unn schunn saat se, was das Ganze koscht. Fascht gleichzeidisch hat´se, falls es 41 Euro 35 koscht, es Wechselgeld uff 50 Euro, das sinn 8 Euro 65, schunn in de Hand. Es schlimmschde, was der Kasseererin jetzt basseere kann, iss wenn ma dann, nodemm ma schließlich sei Geldbeidel in de Eil gehoolt hat, was in de Eil jo bekanntlich besonnersch lang dauert, sei eichenes Kleengeld loswerre will und de Betrag abzählt. Dann muss se nämlich ehr Wechselgeld widder in die Kass serigg sordeere unn die abgezählde 41 Euro 35 aa noch zähle unn weggsordeere. Also, wenn ich beim Aldi die sogenannte Kassenzone hinner ma hann, bin ich immer fix unn ferdisch unn muss se´erscht emool dief Luft hoole.

So, ich wollt awwer vumm Supermarkt vezehle, wo ich meer immer die vekehrt Kass aussuuche. Dobei duun ich se´erscht gugge, wo die wenischde Leit anschdehn, dann gugg ich, wieviel se in ehrm Weensche drin hann unn treffe schließlich mei Entscheidung. Bis ich die getroff hann, iss nadeerlich schunn widder jemand vor mich geschlubbt, awwer irgendwo muss ich mich jo schließlich anschdelle.

Ich kann eichentlich druff gehn, egal, wo ich mich hinschdelle, ich schdehn vekehrt, das hääßt im Klartext, jetzt kommt fa mich e langi Geduldsperiode. An der Kass, wo ich anschdehn, unnerbrecht immer irgendebbes die „Kontinuierlichkääd eines normalen Ablaufes“. Entwedder iss die Vekeiferin nei und wääs die Preise vumm Obst nett unn ruft iwwer die Kolleeschin, odder de Kasseschdreife werd all, unn beim Uffziehe vunn na neie Babierroll klemmt der Kaschde, odder vumm Bürro kommt grad jemand Geld abhole, domett sich nett so viel in de Kass ansammelt. Es muss awwer nett immer an de Vekeiferin leie. Wenn bei däär mool alles glatt geht, hat e Kundin e beschädischdi Joghurtdoos ins Weensche geleet unn hatt´s nett gemerkt. Das bedeit, die Vekeiferin schdellt die besaachde Joghurtdoos nääwer ehr Kass unn die Kundin geht sich e neii hole. Jetzt iss jo die Eier-Butter-Käs-Abteilung, wo´s denne Joghurt gäbbt, nett in de Näh vunn denne Kasse unn das Ganze dauert. Wie´s Gewidder trefft se unnerwäägs noch jemand unn hallt noch e korzes Schwätzje.

Vorne ammer die Leit, die genauso waade misse wie ich, schdiere, großziegisch Ruhe bewahrend, so siehts jeedefalls aus, uff´s Band; hinner meer die fange meischdens an se schdehne und manche komme emm bedrohlich nah. Awwer das helft jo alles nix, irgendwann kommt die Kundin mit ehrer neie Joghurtdoos und dann geht´s halt weider.

Jetzt kann da noch blie´e, vor allem wenn ma junge Leit vor sich hat, mett zwar weenisch Zeich im Weenschde, die bezahle dann ehr Schokorieschel, Cola unn die Tuut Chips mett Scheckkaat. Do hat ma noch Gligg, wenn das Gerät die Scheckkaat annämmt, ansonschde krame die ehr 10 Euro 60 miehseelisch aus ehrm Geldbeidel unn de Hosetasch sesamme. Falls s´es sammekrien, ansonschde droht noch Schlimmeres.

Awwer eens wärr ich nie veschdehn: nääwe draan an der Kass geht´s immer schneller. Awwer wenn ich mich dort angeschdellt hätt, ich hall jeed Wett, wäär dort de gleiche Schlamassel unn ich däät genauso waade. Wie gesaagt, warum das so iss, do komm ich nett dehinna. Mittlerweile hann ich mich irgendwie demett abgefunn, ich schdehn immer an de verkehrt Kass, es iss eenfach so!