Beim Friseer

von Relinde Niederländer

Geschder war ich beim Friseer. Unn jedesmool, wenn ich dort uff´em Schduhl sitze, duun meer die Friseese, die nääwa meer bediene, lääd. Nett, weil se schaffe misse, das misse annere jo aa, nää, sie duun meer lääd fa das, wo se sich so anheere misse, wenn de Daa lang iss. Fa mich, die ich alle paar Wuche mool hiengehn, wenn ich mich gar nimmi siehn kann, iss das jo manchmool ganz indressant, vor alle Dinge, wenn ma die Leit kennt, iwwer die do geschwäddst werd. Genau aus demm Grund sellt ma nett auswärts zum Friseer gehn. Geschbräche iwwer anner Leit sinn doch noor indressant, wenn ma die Leit aa kennt. Also, wenn ich dann noo so´me Besuuch widder heemkomme, wääß ich ganz genau, wer schwer krank iss, wer im Schderwe leit, wo in ´na Eeh enner nääwenaus geht, wer sich schääde losst, usw… Jetzt isses jo so, die wo do uff de Friseerschdiehl hugge, vezehle komischerweis seldener von de Eischene, awwer wenn doch, dann gäwwe se aan wie e Tuut voll Migge. Do wärre noor Abbidure gemacht, schdudeert, neie Heiser gebaut usw., ma kann sich do noor wunnere.

Wie kerzlich so e bissje älderer Herr, der iss im Nääweraum bedient woor. Wenn Männer nett guud heere, schwäddse se jo um so lauder unn so hatt ma halt alles veschdann. Der guude Mann hatt een eenzisches Enggelsche, e Wunnerkind hoch drei, unn vunn demm hatt´er vezehlt so lang, wie´rer uff´em Schduhl gesitzt hatt. Das Kind hatt mett zeeh Monade schunn laafe unn schwäddse gekennt, es iss noch nett im Kinnergaade, awwer vunn de Annlaache her schunn hochintelligent. Uff das Enggelsche waat beschdimmt heit schunn jeder Unniprofessor. Also, do hätts emm kenne schlecht wärre vumm zuheere.

Womett ich jo aa so e bissje Probleme hann, sinn die endlose Geschbräche iwwer Krankhääde. Neilich hatt enni nääwa ma gesitzt und hatt de Frisees vunn ehre Hautprobleme vezeehlt. Ich hätt nie gedenggt, dass Hautprobleme so viel Geschbrächsschdoff biede kenne. Nadeerlich hann die entsprechende Arzt-Odissee´e aa dezu geheert mett de wortreiche Erleiderunge, was jeder Arzt gesaat odder veschrieb hatt.

Apropoo Arzt. Was ich aa noch erfahr hann im Friseerlade, das war awwer an´me annere Daa, wie ma de Blutdrugg, bevor ma zum Arzt geht, in die Heeh treibt, domett der emm krankschreibt. Do breischt ma noor 3 Tasse ganz schdarger Bohnekaffee se dringge unn e leidend Gesicht se mache, so alls wenn ma nett guud Luft kräät, unn schunn däät das klabbe. Außerdemm kann ich jetzt jedem de Name vunn´me Psychiader saan, der, wenn ma mett zirga 55 Johr nimmi schaffe gehn will, emm helft, dass ma wää psychischer Probleme sei Frieh-Rende kriet. Ma brauch do allerdings heitsedaah schunn e bissje Dorschhaldevemeesche, vor e paar Johr hat das noch e bissje schneller geklappt. Wenn ma dann sei Rende hatt, kann ma jo widder fit wärre. Das brauch de friehere Arbeitgeber unn die Rendevesicherung jo dann nimmi se indresseere.

Awwer eens wollt ich jo doch nochmool saan. Die, wo ich am meischde bedauere, sinn die Friseese, die sich fa die paar Greede, wo se vediene, denne ganze Krämmbel jede Daa anheere unn dann aa noch indresseert mache misse, weil das jo Kunnschaft iss.

Es gäbbt bekanntlich noch meeh Berufe, die sich das anduun misse, z.B. Kosmetikerinne odder Fußpflescherinne. Noor, die schaffe meischdens alleen, das hääßt, ma sitzt nett nääwedraan uff´em Schduhl unn kann folschedesse lääder dort nett zuheere.