Aktuelles

2019 hat de Gmoa Grabenstätt auf Anregung vom Rudi Göbel was grimmig's erfund'n

und dazua 4 Frauen und 12 Maner g'fund'n

de a bisserl wos von earnerner Zeit herschenkan

und dabei vor allem an de Bedürftigen denkan -

so hab'ns gemeinsam an „Sozialen Fahrdienst“ ei'g'richt'

und des is für de Bürger – a ganz a feine G'schicht!

Ob Ei'ka'fa, Bank oder Arzttermin

sie bringan Alle – guat und sicher hin,

des machan sie auf alle Fälle – freindlich und a gern

as Hoambringa duat natürlich a dazua g'hör'n,

und hat a Fahrgast amoi a körperliches Problem

werd natürlich a bereitwillig Hilfestellung geb'm -

und dass des dann a no gar nix kost' – kimmt oben drauf

und setzt der G'schicht – de Krone auf....

De Fahrten lafan unter da Woch' vormittags wia g'schmiert

und werd'n von da Hedwig und da Eva sicher organisiert,

hat dann Oaner – amoi tatsächlich koa Zeit,

steht owei sofort – a Anderer bereit

des klappt bei uns – sicher und perfekt

und ma merkt, dass do a „Herzbluat“ dahinter steckt!

A da Burgermoasta is stolz und voller Freid'

weil de Nachbargemeinden schier platzen – vor Neid

sie möcherten nämlich a so an Fahrdienst hab'm

bringan aber bis iatz – nix g'scheid's z'amm,

so segt ma, das des was wirklich „Einmalig's“ is

des ma net so schnell no'moi find' - ganz g'wiss!

De Gmoa hat de Sach' von Anfang o finanziell unterstützt,

des hat dem Projekt natürlich bestens g'nützt,

sie hat uns a bärig's Auto hi'g'stellt

nach unsere Wünsch' und wo nix mehr fehlt,

im Büro duat dann no d'Ilse des Nötigste für uns steiern

und so kinan mia heit sogar scho – as 5jährige feiern,

drum nehmt's iatz Alle Eicher Glas zu Hand

und stessts mit mia o – auf des wunderbare soziale Miteinand!

Karl-Heinz Austermayer/Nov. 2024