Wandern bei uns deham

Die G´schicht von die drei verschwundena Orginale

In an klan Frankenwould Doof sen mir nichts dir nichts bera Noacht drei Orginale verschwunden. Dezu muss me souch, des des Doof erzeit a schwer gebeutelt wed. Denn dä Borchenejfer raubt denn Doof nuch sei schönsts Orginal. Näimlich sein schön Staapilz- und Pfiffer Would. Nur nuch koahla Flächen senn zu sähn, wem mä guckt über des Frankenwould´s Täler und Höhn. Obbe des is a annera G´schicht. Zurück zu kumma auf die seit Joahnzehnte verschwundna Orgiale. Me hot ja eigenlich gedoch des sa vielleicht wider amol auftauchn, obbe es hor sich seitdem neggs gedo. Denn wejche hom sich die Heimatkundler vä denn ‘Doof, die sich jejden Sunntouch im „Waldfrieden“ zen Dämmerschoppen treffen gedoch, amoll dou nouch-zeforschen, wu die drei Orginale hie kumma sei könntn. Denn die drei Originale senn wie des Hertz ve denn Doof gewejsen. Stellt euch amoll voh, dou dejt sich ane übera Noacht denn Eilazwerch vom Pressicher Boahuf neu seiner Kejlerpaar stelln. Als wärs sei eichner Schatz! Die drei Orginale ve denn klann Doof senn viel Wertvoller als der Goldraub vo denn Grüna-Gewölbe ve Driesden, raktisch unbezoahlpoa. Denn Orginale, ve an klann Doof, dut me hejng und pflejng. Woa des nie widder schö, wie o „Drei König“ die Stänsinger durch unnen klann Doof ganga sen. Des is näimlich ach a unbezoahlpoarer Schatz fä unnen klann Doof. Beim Abriß dä „Schüles Villa“ hot me Hofnung kout was ze finna, oube dou woa ah nechs. Zu Zur schüfen und groum sa ja ah in der ehmoalign Leiner Bräu Gaststätn „Zum Frankenwald“. Öb dou was zenn Vorschein kümmt des glam diea Heimatkundler zwo nie, oube wä waas. Mä däf die Hoffnung nie aufgejb, des wos gfunna wäd. Ja wu sa ne hie kumma ist, unne Orginala-Ortschroniktoufel. Joahzehnte woa sa on alten Börchermaster, den „Hansgörch-Michel“ seina Scheuna auskenngt. Su schö mit Grünzeuch eischmückt, woa sa die schönst vo unnen ganzen Landkreis Kronich. Aufamol woa sa übera Noacht wejch und is seit dem nimmer augetaucht. Vom Heinz sein „Schönsten Platz“ aus, am Hildenrundwejch, hot amol a Künstler, der in unnen schän Frankenwald Wanderurlaub gmocht hot, a Bleistiftzeichnung ve unnen schön Doof gmoult. Des Tejllergrusa-Orignoal hot sich ahne seid dä 750 Joahfeier untern Nougel grissen und seit dem voas nimmer aufzefinna. Ja me glabt nie, wos mancha Leut alles su brauch könna.

Ihr wäts nie klam, oube wä braucht denn um gottswilln a Gedenktoufel?

Zum doamoaligen Staabruchunglück is amol a Gedenkstaa mit aner Gedenktoufel ohn Stabruchwejch aufgstellt woan. Der doamalich Pater hot die Gedenkstätt suoar gweiht, demit des dou ah immen sein Platz hot. Oube ach die Orginal-Gedenktoufl mit der Aufschrift der Verunglückten is seit Joahna verschwunden und der Staa is beim Wejchtransportiern kaput ganga. Obbe wie scho gsocht, es bitra die soung des is mei Schatz, obwohl sa demit nechs ofang könna. Ausser sie steckens nei ihrn Bettkastn demit sa gut drauf schlouf könna. Es wär ja schö wenn die drei Orginale ve denn klann Doof widde aufdauchn dejten, a würdige Platz dejt sich bestimmt finna. Für sachdienlicha Hinweis senn die Heimatkundler aus denn klann Doof, des sich seit 1923 „Klein Berchtesgaden im Frankenwald“ nennt sehr dankboar. Vieleicht kömme amoll o an Sunntouchoumt im Waldfrieden bei an Seidla Bier vertraulich zammakum. Mir dejten uns fei freua.

A „grüß Gott“ ve die Fötschadöffe Heimatkundler und Wanderfreunde.

Wandern bei uns deham

Die Wanderfreunde des SV Förtschendorf laden am Samstag, den 25.02.2023 zu einer ca. 8 km Rundwanderung bei Neukenroth ein. Treffpunkt ist um 13.30 Uhr am Parkplatz der Zecherhalle. Abfahrt in Förtschendorf um 13.15 Uhr nähe der Bahnhaltestelle. Gäste sind herzlich Willkommen, Einkehr ist geplant, festes Schuhwerk ist ratsam.