Senioren unterwegs
De Leite, die immer mitfoahrn hamm ma weller na Riesa jewoollt.Is woar jar niche so leichte in di Teechbude in Termin zu kreien. Awwer firn November hatts denne jeglappt.
So jejen virtel zeehne sinn mer denn o los mitn Bus aus Oboom Richtung Torge un denn immer weiter uff de oahle Poststroaße ewwer Beljern un Strehle na Riesa.
Mit den Foahrer sinn mer schon effter unnerwejens jewesen. Bis jetz hotte uns immer weller heeme gebracht.
Uffn Parkplatz hott schon enne „Reisebegleiterin“ uff uns jewoart, eene, die immer alles wees ewwer de Historije un so. Eene janze Stunne hat se jeredt ewwer Jott un de Welt, awwer scheen hat se jesprochen, wie ne Lehrerin hatses jemacht. Wir hamm denne o mächtich jeglattscht.
Nu hoatten mer uns awwer ne Pause vardient. Der Foarer hoatte Kaffe jebrieet und Bockwürschte warm jemacht. Das hamm mer oalles verzeert.
Denne sinn mer rin in de Fabrike. Erscht ins Museum, wo alles zu de Nudeljeschichte uffjehongen woar. En Film hamm se o noch gezeijet. Nu wissn mer oalles.
Denn hamm mer so ne Kluft jekreiet, wejen de Higijene, o fern Kopp, damit keene Hoare innen Teech foalln. Uff de Oahrn kreieten mer noan Steppsel. Doa hamm mer die Dame, di uns oalles verklickert hat besser jeheert bei die lauten Maschinn.
Doas woar o alles seere scheen.
Denne jings in nen Verkoofsloaden – Nudeln ewwer Nudeln. Un de Leite hamm jekooft. Weer weeß was foar Zeiten noch uff uns zukumm?
Jetze jings enndlich zus Cafe. In Rode jibbets eene jutjehende Jaststette. Da jabes denn frisch Jebrieten un zwee kleene Sticke Kuchn. Un weils da so scheen woar, blewwen se oalle noch en bißchen sitzen.De meesten taten noch een Eis verzeehrn, en poar Menner natierlich en Bier un een zwee Liköre hingerdrin.
Denne sinn mer heeme gefoaren Alle woaren weller seehre zefrieden mit de Reise.
Ich habe es dieses Mal auf „Kembargsch“ versucht, Frau Bergmann aus Gommlo kann es sicher besser und vielleicht noch dieser oder jene. Wobei nicht das Reden das Problem ist, sondern das Schreiben.