Im Gedenken an Professor Faßke
Im Alter von 91 Jahren ist Herr Prof. Dr. Helmut Faßke aus Commerau am 15. Januar 2024 verstorben.
Wir trauern um einen Slawisten und Sprachwissenschaftler von internationalem Rang, der u. a. mit dem Sorbischen Sprachatlas sowie seiner wissenschaftlichen Grammatik der sorbischen Schriftsprache Herausragendes geleistet hat.
Der Erhalt unserer Sprache und Kultur war ihm zeitlebens eine Herzensangelegenheit. Dafür hat er sich nicht zuletzt als Vorsitzender des Domowina-Regionalverbandes Bautzen sowie als Vorsitzender und Vorstandsmitglied der Domowina-Ortsgruppe Commerau/Truppen engagiert. Wir werden sein Andenken in Ehren bewahren.
Srjedź januara rozšěri so w Serbach powěsć, zo je knjez profesor dr. Helmut Faska zemrěł. Poslednje měsacy bydleše w starowni w Njeswačidle a někotři z nas su jeho tež tam wopytali. Jako bydleše hišće w Komorowje, na swojich 90. narodninach, překwapi jeho Krabatowa skupina Rakečanskeje pěstowarnje z pěknym dwurěčnym programom. Na wobrazach wo tutym podawku je widźeć, kak jara su jeho dźěći ze swojimi serbskimi spěwami a rejemi zwjeselili.
Móžu so hišće derje na wopyt knjeza profesora pola nas doma dopomnić, to bě drje 2005. Tehdy bě wón předsyda našeje Domowinskeje skupiny a chcyše tutón nadawk do młódšich rukow dać. Wón praji mi cyle runjewon: Pak ty to činiš, pak jow wšo wusnje. 2006 buch jako nowa předsydka skupiny wolena. Zdobom připraji mi wón swoju podpěru: Profesor Faska wosta hišće tójšto lět čłon skupinskeho předsydstwa, wón pisaše a roznošowaše přeprošenja a nimo toho wjedźeše swědomiće našu skupinsku chroniku. Husto pobych pola njeho a prošach jeho wo pomoc – w organizatoriskich naležnosćach runje tak kaž při rěčnych prašenjach. Ze swojej bohatej wědu a swojimi wobšěrnymi nazhonjenjemi je mi wón přeco derje radźił. Sym dźakowna za mnohe dobre rozmołwy z tutym wysoko zdźěłanym čłowjekom, Serbom z krutym rjapom, kotrehož sym stajnje jako sprawneho a spušćomneho dožiwiła. Njech je jemu serbska zemja lochka.