Wózjawjenje wó pšawje na póglědnjenje do zapisa wuzwólowarjow a wuźělenju wólbnych łopjenow za wólby głownoamtskego šołty dnja 28. septembra 2025
1. Do zapisa wuzwólowarjow móžo kuždy póglědaś w casu wót 8. septembra až do 12. septembra 2025 w pśizjawjeńskem amśe wobydlarjow (śpa 1.05 a 1.06), Barlinska droga 19 w 03099 Gołkojce, do wuzwólowanja wopšawnjone póglědaś. Městno póglědanja jo bźez barierow.
Póglědnjenje jo móžne w powšyknych słužbnych góźinach ako slěduju:
| pónjeźele w casu wót zeger | 09:00 do 12:00 a 14:00 do 15:00 |
| wałtoru w casu wót zeger | 09:00 do 12:00 a 14:00 do 18:00 |
| srjodu w casu wót zeger | 09:00 do 12:00 a 14:00 do 15:00 |
| stwórtk w casu wót zeger | 09:00 do 12:00 a 14:00 do 17:00 |
| pětk w casu wót zeger | 09:00 do 12:00. |
Kuždy do wuzwólowanja wopšawnjony móžo pšawosć a dopołnosć swójich do zapisa wuzwólowarjow zapisanych datow pśekontrolěrowaś.
Gaž co do wuzwólowanja wopšawnjony pšawosć abo dopołnosć drugeje do zapisa wuzwólowarjow zapisaneje wósoby pśekontrolěrowaś, musy pśeznanjecy na fakty pokazaś, z kótarychž njepšawosć abo njedopołnosć zapisa wuzwólowarjow wujś móžo. Pšawo na pśekontrolěrowanje njewobstoj pla datow do wuzwólowanja wopšawnjonych wósobow, za kótarež jo w pśizjawjeńskem registrje zakaz informěrowanja pó § 51 wótstawk 1 zwězkoweje pśizjawjeńskeje kazni zapisany.
Zapis wuzwólowarjow wjeźo se w awtomatizěrowanej formje. Póglědnjenje jo z datowym wuwidnjakom móžne.
Wuzwólowaś móžo jano, chtož jo do zapisa wuzwólowarjow zapisany abo chtož ma wuzwólowańske łopjeno.
2. Chtož ma swóje pódaśa w zapisu wuzwólowarjow za njepšawy abo njedopołny, móžo w górjejce pódanych casach póglědanja, nejpózdźej až do 12. septembra 2025, 12:00 góźin pla gmejny Gołkojce, pśizjawjeński amt wobydlarjow, Barlinska droga 19, 03099 Gołkojce zapódaś spśesiwjenje. Spśeśiwjenje móžo se pisnje abo ako wuzwjawjenje k zapisanju zapódaś.
3. Do wuzwólowanja wopšawnjone, kenž su do wuzwólowarskego zapisa zapisane, dostanu až do 7. septembra 2025 wólbnu powěźeńku. Na slěznem boce wólbneje powěźeńki jo póžedanje na wuźělenje wuzwólowańskego łopjena. Chtož jo zapisany do zapisa wuzwólowarjow a wuzwólowańske łopjeno njama, móžo jano w tom wuzwólowańskem wobceŕku wuzwólowaś, źož jo zapisany do wuzwólowarskego zapisa.
Chtož njejo dostał wólbnu powěźeńku, pak mysli, až jo do wuzwólowanja wopšawnjony, musy zapódaś spśeśiwjenje pśeśiwo zapisoju wuzwólowarjow, jo-lic njoco pśiś do tšachoty, až swójo wólbne pšawo wugbaś njamóžo.
Do wuzwólowanja wopšawnjone, kenž su se jano na póžedanje zapisali do zapisa wuzwólowarjow a kenž su južo dostali wuzwólowańske łopjeno a pódłožki listowego wuzwólowanja, njedostanu wuzwólowańsku powěźeńku.
4. Na póžedanje se zapišu do zapisa wuzwólowarjow:
| - | do wuzwólowanja wopšawnjone wósoby, kótarychž głowne bydlenje zwenka wólbnego teritorija lažy, gaž how swójo stawne bydlenje w zmysle Bergaŕskich kazniskich knigłow maju |
| - | do wuzwólowanja wopšawnjone wósoby, kenž se bźez bydlenja normalnje we wólbnem teritoriju wobźarže a |
| - | do wuzwólowanja wopšawnjone bergarje unije, kenž njejsu winowate se pśizjawiś. |
Póžedanje na zapisanje do zapisa wuzwólowarjow ma se pisnje abo ako wuzwjawjenje k zapisanju zapódaś nanejpózdźej až do 13. septembra 2025 pla pśisłušnego wólbnego zastojnstwa. Póžedanje stajeca wósoba ma wólbnemu zastojnstwoju napśeśiwo wobwěsćiś, až njejo hyšći pla žednogo drugego wólbnego zastojnstwa póžedała zapisanje do zapisa wuzwólowarjow.
Zbrašona do wuzwólowanja wopšawnjona wósoba móžo wužywaś pomoc wósoby swójeje dowěry.
5. Chtož ma wuzwólowańske łopjeno, móžo wuzwólowaś w kuždyckem wólbnem wobceŕku wólbnego teritorija abo z listowym wuzwólowanim.
6. Wuzwólowańske łopjeno dostanjo na póžedanje:
| 1. | do zapisa wuzwólowarjow zapisana do wuzwólowanja wopšawnjona wósoba, | |
| 2. | do zapisa wuzwólowarjow njezapisana do wuzwólowanja wopšawnjona wósoba, | |
|
| a) | gaž dopokazujo, až jo bźeze swójskeje winy zakomuźiła cas stajenja na zapisanje do zapisa wuzwólowarjow abo gaž jo zakomuźiła cas spśeśiwjenja pśeśiwo zapisoju wuzwólowarow |
|
| b) | gaž jo jeje pšawo na wobźělenje pśi wuzwólowanju nastało akle pó casu stajanja póžedanja abo pó casu spśeśiwjenja |
|
| c) | gaž jo se jeje pšawo na wuzwólowanje zwěsćiło w spśeśiwjeńskem póstupowanju a zwěsćenje jo gmejnskemu zastojnstwoju dojšło akle pó zakóńcenju zapisa wuzwólowarjow k wěsći. |
Wuzwólowańske łopjena mógu se póžedaś wót tych do wuzwólowaŕskego zapisa zapisanych do wuzwólowanja wopšawnjonych až do 26. septembra 2025, 18:00 góźin, pla wuzwólowańskego zastojnstwa wustnje, pisnje abo elektroniski.
Do zapisa wuzwólowarjow njezapisane do wuzwólowanja wopšawnjone mógu z tych pód 6.2 pismiki a) do c) pódanych zawinow póžedanje na wuźělenje wólbnego łopjena hyšći stajiś až do wólbnego dnja, 15:00 góźin.
W paźe dopokazanego njezjapkego schórjenja, dla kótaregož wuzwólujucy do wólbnego lokala pśiś njamóžo, abo móžo tam dojś jano pód njepśiśpiwajobnymi śěžkosćami, móžo se póžedanje stajiś hyšći až do wólbnego dnja 15:00 góźin.
Zgubjone wuzwólowańske łopjena a głosowańske lisćiki se njenarownaju. Wobwěsćijo do wuzwólowanja wopšawnjony pśeznanjecy, až jomu póžedane wuzwólowańske łopjeno dojšło njejo, móžo se jomu až do wólbnego dnja 15:00 góźin, nowe wuzwólowańske łopjeno wupisaś.
Chtož stajijo póžedanje za drugu wósobu, musy z pisnym społnomócnjenim dopokazaś, až jo k tomu wopšawnjony. Zbrašony do wuzwólowanja wopšawnjony móžo pśi stajenju póžedanja wužywaś pomoc drugeje wósoby.
7. Njewuchada-lic z póžedanja za wuzwólowańskim łopjenom, až co do wuzwólowanja wopšawnjony pśed wólbnym pśedsedarstwom wuwzólowaś, tak dostanjo z wuzwólowańskim łopjenom rownocasnje:
| - | amtski głosowański lisćik, |
| - | amtsku šeru wobalku za głosowański lisćik, |
| - | amtska cerwjena wólbna wobalka a |
| - | zaspomnjeńku za listowe wuzwólowanje. |
8. Wótewześe wuzwólowańskich łopjenow a pódłožkow listowego wuzwólowanja za drugego jo jano móžne, gaž se wopšawnjenje pśiwześa pódłožkow z pśedpołoženim pisnego społnomócnjenja dopokazujo a społnomócnjona wósoba wěcej ako styrjoch do wuzwólowanja wopšawnjonych njezastupujo; to ma wólbnemu zastojnstwoju pśed pśiwześim pódłožkow pisnje wobwěsćiś. Na pominanje ma se społnomócnjona wósoba wupokazaś.
Pśi listowem wuzwólowanju musy wuzwólujuca wósoba wuzwólowański list z głosowańskim lisćikom a wuzwólowańskim łopjenom tak scasom na pódane městno wótpósłaś, až wólbny list tam nejpózdźej na wuzwólowańskem dnju do 18:00 góźin dojźo.
Chtož cytaś njamóžo abo dla śělneje brašnosći w połoženju njejo, listowe wuzwólowanje wósobinski wugbaś, móžo wužywaś pomoc wósoby swójeje dowěry (pomocna wósoba). Na wuzwólowańskem łopjenje ma wuzwólowaŕ abo pomocna wósoba wólbnemu zastojnstwoju napśeśiwo město pśisegi wobwěsćiś, až jo se głosowański lisćik wósobinski wóznamjenił.
Wólbny list se we Zwězkowej republice Nimska bźeze wósebneje pśepósłańskeje formy jano wót Nimskego posta AG dermo pósrědnijo. Wón móžo se teke pśi tom na wólbnem lisće pódanem městnje wótedaś.
9. Wósobam, kenž su dostali wuzwólowańske łopjeno, se pśi ewentualnem wuskałanju pó zastojnsku zasej wuzwólowańske łopjeno pśipósćelo, jo-lic z póžedanje njewujźo, až co pśi wuskałanju w swójom wólbnem wobceŕku wuzwólowaś.
Wósobam, kenž su akle k wuskałanju do wuzwólowanja wopšawnjone, se pó zastojnsku wuzwólowańske łopjeno pśipósćelo.
Gołkojce, dnja 30. julija 2025