Wólbne wózjawjenje za wuzwólowanje do krajnego sejma dnja 22. septembra 2024

Dnja 22. septembra 2024 buźo wuzwólowanje do 8. krajnego sejma Bramborskeje.

Wólba trajo wót zeger 8.00 do 18.00.

Město Grodk/Spremberg se rozrědujo do 29 wólbnych wobceŕkow. W wuzwólowańskich powěźeńkach, kenž su se k wuzwólowanju wopšawnjonym wósobam do 01. septembra 2024 pśipósłali, su zapisane wólbny wokrejs, wólbny wobceŕk a wólbny lokal, w kótaremž wóni mógu wuzwólowaś.

Pśedsedaŕstwa listowego wuzwólowanja stupaju gromadu na wuzwólowańskem dnju, aby zwěsćili wuslědki listowego wuzwólowanja zeger 15.00 w zakładnej šuli „Kollerberg“ na Zedlitzowej droze 1 w Grodku/Spremberg.

Kužda do wuzwólowanja wopšawnjona wósoba, ako njama wólbne łopjeno, móžo jano w tom wólbnem lokalu togo wólbnego wobceŕka wuzwólowaś, do kótaregož zapisa wuzwólowarjow jo zapisana.

Wuzwólujuce wósoby maju swóju wuzwólowańsku powěźeńku a płaśecy personalny dokument z pasowym fotom sobu pśinjasć. Wóni maju se wupokazaś na pominanje wólbnego pśedsedaŕstwa. Wuzwólowańsku powěźeńku deje wótedaś pśi wuzwólowanju.

Wuzwólujo se z amtskimi głosowańskimi lisćikami. Kužda wuzwólujuca wósoba dostanjo w wótpowědnem wólbnem lokalu amtski głosowański lisćik.

Kužda wuzwólujuca wósoba ma jaden prědny głos a jaden drugi głos.

Głosowański lisćik wopśimjejo, wótpowědujucy rědoju numerow wuzwólowańskich naraźenjow,

a)

za wólbu pó wokrejsnych wuzwólowańskich naraźenjach pśizwólone kandidaty wokrejsa z familijowym mjenim, z pśedmjenim resp. pśedmjenjami, z pówołanim abo z źěłabnosću a z bydlišćom se procujucych kandidatow tak ako z mjenim partaje, politiskego zjadnośeństwa abo zjadnośeństwa lisćiny. Wopśimjejo teke krotke mě takego zjadnośeństwa, jolic take wužywa, abo pomjenjenje „Jadnotliwa kandidatka“ abo „Jadnotliwy kandidat“ za se procujucych kandidatow, kótarež njezastupuju partaju, politiske zjadnośeństwo abo zjadnośeństwo lisćiny. Wótpšawa mjenja kandidata jo krejz za wóznamjenjenje. Gaž su zjadnośeństwa lisćinow we wokrejsnych wuzwólowańskich naraźenjach, wopśimjejo głosówański lisćik mjenja a, gaž to maju, krotke mjenja wobźělonych partajow abo politiskich zjadnośeństwow.

b)

Za wólbu pó krajnych lisćinach wopśimjejo głosowański lisćik pśizwólone krajne lisćiny z mjenim partaje, politiskego zjadnośeństwa abo zjadnośeństwa lisćiny. Jolic wužywa krotke mě, wopśimjejo teke to, tak ako pśedmě a familijowe mě prědnych pěś procowarjow. Wótlěwa mjenja partaje, politiskego zjadnośeństwa abo zjadnośeństwa lisćiny jo krejz za wóznamjenjenje. Gaž su krajne lisćiny wót zjadnośeństwow lisćinow, wopśimjejo głosowański lisćik mjenja a, gaž to maju, krotke mjenja wobźělonych partajow abo politiskego zjadnośeństwa.

Wuzwólujuca wósoba wótedajo

swój prědny głos na tu wašnju,

až na lěwem boce głosowańskego lisćika z do krejza stajoneju kśicku abo na hynakšu wašnju jasnje wobznamjenijo, kótarej kandidatce abo kótaremu kandidatoju dej płaśeś, a

swój drugi głos na tu wašnju,

až na pšawem boce głosowańskego lisćika z do krejza stajoneju kśicku abo na hynakšu wašnju jasnje wobznamjenijo, kótarej krajnej lisćinje dej płaśeś.

Wuzwólujuca wósoba musy głosowański lisćik we wólbnej kabinje wólbnego lokala abo we wósebnej pśibocnej jśpě njewiźona wobznamjeniś a tak złožony scyniś do wólbneje urny, až wokolne wósoby njamógu spóznaś wobznamjenje.

Wuzwólowanje ako teke se pśizamkujuce wulicenje a zwěsćenje wuzwólowańskich wuslědkow we wólbnem wobceŕku stej zjawnej. Kužda wósoba ma pśistup, tak daloko až jo to bźeze mólenja wólbnego procedere móžno.

Wob wuzwólowański cas jo we a pśi twarjenju, w kótaremž jo wólbny lokal, tak ako direktnje pśed zachodom twarjenja zakazane kuždycke wobwliwowanje wuzwólujucych wósobow pśez słowa, zuk, pismo abo wobraz tak ako kuždycka zběrka pódpisow (§ 35 Krajneje wólbneje kazni Bramborskeje).

Wuzwólujuce wósoby, kenž maju wuzwólowańske łopjeno, mógu se we wólbnem wokrejsu, w kótaremž su wustajili wuzwólowańske łopjeno,

a)

z wótedaśim głosa w někakem wólbnem wobceŕku togo wólbnego wokrejsa abo

b)

se z listowym wuzwólowanim

wobźěliś na wuzwólowanju.

Chtož co wuzwólowaś z listowym wuzwólowanim, musy sebje pla wólbnego zastojnstwa wobstaraś amtski głosowański lisćik, amtsku wobalku za głosowański lisćik ako teke amtsku wobalku za wólbny list. Wóna/wón musy swój wólbny list z głosowańskim lisćikom (w zamknjonej wólbnej wobalce) a z pódpisanym wuzwólowańskim łopjenom tak scasom městnoju pśipósłaś, kótarež jo na wobalce za wólbny list pódane, až wón tam dojźo nanejpózdźej na wólbnem dnju do zeger 18.00. Wólbny list móžo se teke wótedaś pla pódanego městna.

Slěpe a na wiźenje škódowane luźe mógu wužywaś wuzwólowańsku šablonu, aby wobznamjenili swój głosowański lisćik. Wuzwólowańsku šablonu dostanu zadermo a mógu pominaś wót:

Blinden- und Sehbehinderten-Verband Brandenburg e.V.

Droga młoźiny 114

03046 Chóśebuz

telefon: 0355/22549

faks: 0355/7293974

Chtož njewopšawnjony wuzwólujo abo wacej njepšawy rezultat wuzwólowanja zawinujo abo rezultat sfalšujo, se wótštrofujo z popajźenim až do 5 lět abo z pjenjezneju pokutu. Wopytanje togo se pokuśi (§ 107a wótstawk 1 a 3 Pokuśeńskich kazniskich knigłow).

Pokazki k reprezentatiwnej wólbnej statistice

We wólbnyma wobceŕkoma 10 a 19 wužywaju za statistiske wulicenja głosowańske lisćiki, na kótarychž stej zapisanej rod a lěto naroźenja w starstwowych kupkach. Ten procedere jo rědowany a pśizwólony we wólbnej kazni za krajny sejm Bramborskeje (Bramborska kazń za krajnu wólbu – BbgLWahlG) wót 28. januara 2004 (GVBI.I/04, [nr. 02], bok 30), slědny raz změnjony pśez kazń wót 4. julija 2023 (GVBI.I/23, [nr. 17]).

Pśi wužywanju tych głosowańskich lisćikow jo pśekśiwjenje wólbnego pótajmstwa wuzamknjone.

Dalšne informacije móžośo se dopšašaś pśi měsće Grodk/Spremberg. Tam jo dostaś złožone informaciske łopjeno.