Wólbne wózjawjenje

1.

Dnja 08. měrca 2026 budu wuzwólowanja krajnego raźca wokrejsa Sprjewja-Nysa.

Buźo-lic notne wuskałanje, toś buźo to dnja 22. měrca 2026.

Wuzwólowanje trajo pśecej wót zeger 8.00 až do 18.00 góźin.

2.

Wólbny teritorij města Spremberg/Grodk jo rozdźělony do 29 powšyknych wólbnych wobcerkow.

Na wuzwólowarskich powěźeńkach, kenž su se k wuzwólowanju wopšawnjonym nanejpózdźej až do 15. februara 2026 pśipósłali, stej wólbny wobcerk a wólbny lokal pódanej, źož móžo k wuzwólowanju wopšawnjona wósoba swójo wuzwólowańske pšawo wugbaś.

3.

Kužda do wuzwólowanja wopšawnjona wósoba móžo jano w tom wólbnem lokalu wólbnego wobcerka wuzwólowaś, źož jo do zapisa wuzwólowarjow zapisana.

Wuzwólowarje maju swóju wuzwólowarsku powěźeńku a amtski personalny dukoment (personalny wupokaz abo drogowański pas) k wuzwólowanju sobu pśinjasć. Wuzwólowarska powěźeńka se glědajucy na ewentualnje trjebne wuskałanje zasej slědk dajo.

Wuzwólujo se z amtski zgótowanymi głosowańskimi lisćikami, kenž su we wólbnem lokalu pśigótowane a se do wuzwólowanja wopšawnjonej wósobje pśi zwěsćonem pšawje na wuzwólowanje do rukowu daju.

4.

Wótedaśe głosa

Za wuzwólowanje krajnego raźca wokrejsa Sprjewja-Nysa ma kužda do wuzwólowanja wopšawnjona wósoba jaden głos.

Wótedaśe głosa se gótujo na tu wašnju, až do wuzwólowanja wopšawnjona wósoba mě togo kandidata, kótaremuž co swój głos daś, z nakśickowanim na głosowańskem lisćiku za wuzwólowanje krajnego raźca wokrejsa Sprjewja-Nysa jasnje wóznamjeniś musy.

Samske płaśi teke za ewentualne wuskałanje.

Jo-lic pśi wuskałanju jano jaden kandidat pśizwólony, ma se do krejsa pla słowowu „jo” abo „ně” kśicka stajiś.

5.

Wuzwólowańske procedere ako teke tomu se pśizamknjece wulicenje a zwěsćenje wólbnego wuslědka su zjawne. Kuždy ma pśistup, tak daloko ako jo to bźeze mólenja wólbnego procedere móžne.

Wuzwólowański zastojar we wótpowědujucem wólbnem wobcerku ma se staraś wó měr a pórěd. Stakim jo wopšawnjony,wósoby, kenž móle wuzwólowańske procedere respektienje wulicenje, z lokala wupokazaś.

6.

Do wuzwólowanja wopšawnjone wósoby, kenž maju wuzwólowańske łopjeno, mógu se na wuzwólowanju wobźěliś

pśez wótedaśe głosa w kuždyckem wólbnem wobcerku wólbnego teritorija abo

pśez listowe wuzwólowanje.

7.

W paźe wusakłanja dostanu do wuzwólowanja wopšawnjone wósoby, kenž su za głowne wuzwólowanje wuzwólowańske łopjeno póžedali a dostali pó zastojnsku zasej wuzwólowańske łopjeno za wuskałanje wupisane. Samske płaśi za te do wuzwólowanja wopšawnjone wósoby, kenž su akle za wuskałanje do wuzwólowanja wopšawnjone.

8.

Chtož co z listowym wuzwólowanim wuzwólowaś, musy se w pśisłušnem wólbnem zastojnstwje wobstaraś amtski głosowański lisćik, amtske wólbne listowe wobalki (nutśikownu a wenkownu wobalku) a swój wólbny list z głosowańkim lisćikom (w zacynjonej nutśikownej wobalce a pódpisanym wuzwólowańskim łopjenom tak z scasom na to na wuzwólowańskej listowej wobalce pódane městno wótpósłaś, tak až tam nejpózdźej na wuzwólowańskem dnju až do 18.00 góźin dojźo. Wólbny list móžo se teke na tom na wenkownej wuzwólowańskej listowej wobalce pódanem městnje wótedaś.

Wótedaśe wólbnych listow na wuzwólowańskem dnju w wólbnem lokalu njejo móžne a móžo k tomu dowjasć, až wólbny list pla pśisłušnego wuzwólowańskego wjednika ze zakomuźenim dojźo.

Za zawcasny dochad wólbnego lista pla pśisłušnego wuzwólowańskego wjednika jo kuždy wuzwólowaŕ listowego wuzwólowanja sam zagronity.

9.

Zwěsćenje wuslědkow wuzwólowanja se wótměwa njepósrědnje pó wuzwólowanju wót zeger 18.00 we wólbnych lokalach wšych wólbnych wobceŕkow.

Zwěsćenje wuzwólowańskich wuslědkow a wuslědkow listowego wuzwólowanja stej zjawnej.

Wósebne zwěsćenje wuslědkow listowego wuzwólowanja se zachopijo zeger 18.00 we Wokrejsnem domje, Droga Heinricha Heinego 1 w 03149 Baršć. Pśedsedaŕstwa listowego wuzwólowanja stupaju gromadu zeger 15.30, aby pśedwobźěłali wólbne listy (§ 67 wótstawk 5 Bramborskeje kazni za komunalne wólby - BbgKWahlG).

10.

Kuždy do wuzwólowanja wopšawnjony móžo swójo wólbne pšawo jano jaden raz a jano wósobinski wugbaś. Chtož njewopšawnjony wuzwólujo abo teke howacej k njepšawemu rezultatoju wólbow dowjeźo abo wuslědk sfalšujo, se wótštrofujo z popajźenim až do 5 lět abo pjenjezneju pokutu. Teke wopytanje se wótštrofujo (§ 107a wótstawk 1 a 3 kazniskich wótštrofowańskich knigłow).