Mien sünnerboren Droom von de nuurddüütschen Tokunft
In dissen unruhigen Tieden schlöppt man towielen nachts schlicht un dröömt trallig Saken! Kiekt man sülwst, leew Plattdüütsch-Läsers, wat ick vörgistern dröömt heww: „In denn` Stanley Kubrikfilm „2001 Odyssee im Weltraum“ hemm` sick jo `n poor Astronauten infrieren laten, üm so bannig wiet in dat Weltall to kamen. Dorüm kem ick in mienen Droom up de abstruse Idee, dat ok mal eens sülwst an mi uttopröben. Villicht ward ick dunn in een bäteren Ierdtiet wedder upweckt un beläwte intressante Saken! Geseggt, gedan – nah ungefihr tweehunnertföfftig Johren is dunn dit passiert – Een schmucken schwarten Diern küßt mi meddags wach un bringt mi wat to Äten un Drinken! Dunnerwäder, „Huurnhääkt in Aspik mit Bradtüften un een Buddel Slöhnwien“, diss plietschen Fruu hett nau mienen Geschmack drapen! Nahdem ick richtig satt wier kem een minschenähnlichen Roboter up mi to. Ruck-Zuck hett diss unfründlichen Maschin mi mien Borgeld afnahmen un fix een RFID-Chip in mienen linken Handrüggen inplant`t! Ick wier ierst mal baff, mit so väl Frechheit harr ick in de Tokunft nich räkent! Dat kem dunn oewer noch dicker: Een anner Roboter, mit `n groten Bildschirm up de Bost, wiest mi dit an: „Dear ollen weißen Mann, der schon very long hier lebt, wellkomm in der Chinesischen Enklave „Mecklenburg-Strelitz“! Unsere weisen Leader:in, Xups Plupang, mit dem tamilischen Wächterengel Ayannar, begrüßen Dich zum Einchecken in die Workgruppe „Planwirtschaft-Kapitalistische Erziehung“. Wat dit bedüüdte, wier mi tonehgst nich kloor, oewer nah dree Stunnen Ünnerricht künn man seggen: Brägenwasch von de oewelsten Oort in een Kauderwelschspraak (Düütsch-Engelsch-Chinesisch). Jichtens erinnerte mi dat an de DDR, an denn` Staatsbürgerkunde-Ünnerricht. Personenkult in de Tokunft, na dunn Prost Mahltiet!
De Lüüd, dee in Niegenbramborg ümherleepen wieren mihrstendeels Cyborgs. Un wat noch upföl, up de Straaten fohrten kuum Autos, ick heww dorför bannig väl Elektrobusse sehn, in de de Lüüd mit ehr Roboters un Huusdieren instägen. An jeden Strateneck geew dat bannig väl Kameras, dee allens, wat up de Ierd passierte, oewerwachten. Eigenorrigerwies föl ümmer wedder de Strom ut, dat weihgte dissen Dag kuum Wind un geew väl Wulken! Up groten Plakaten würden denn` politischen Idolen von klatschenden Inwahners huldigt! Uns` Heimatspraak, Neddderdüütsch, is utstorben, de Maekelborgers, dee ick up Platt anschnackt heww, käken mi an, as wier ick een Uterierdischen!“
Up eenmal geew dat een Dunnerlüchting; Gott sie Dank, een Nachtgewitter hett mi von dissen bösen Droom erlöst. Natt von`n Schweet wakte ick up un heww mi freugt, dat dat nur een bannig schlichten Alpdroom wier!