Mr. Spock un sien Buurdarzt up Iesmaand Tethys

Leew Läsers,

stellt Juuch man vör dat gew `n groten Knall un Ji würden in denn` dreeuntwindigsten Johrhunnert upwaken, wat wier dat woll för een dolles Beläwnis! Ierst mal harren wi dunn een anner Berliner Regierung un de Minschen sünd dunn `n bäten wieser worden un dat gew ok keenen Krieg mihr up uns blaagen Ierd!

An`n 22. Märzmaand 2283 kem dat Ruumschipp „Enterprise“ in unsen Sünnensystem an. Kiek an, twee olle Bekannte, Kaptein Kirk un de Vulcanier Mr. Spock, as Commander, harren dor dat Seggen up ehr stolten Schipp! Beid` stünnen bannigen ünner Druck, dat Water up ehr schmucken Enterprise wier fast all. Nattes von de Ierd künnen se nich halen, dorüm schlögen sick de letzten Minschen un Diere! Deswägen söchten se sick denn` Jupitermaand „Tethys“ ut, üm von dor dat Water to halen. Tethys, wat för een schönes Wuurt: Diss Maand würd von Herrn Cassini, een franzöösch Astronom, mit italienischen Wörteln, all 1684 entdeckt. Sienen Namen kreeg` diss Iesmaand nah denn` Titanen Tethys von de Griechisch Mythologie! Tethys sülwst wier de Mudder von dat Hauptfleet in`n Universum! So hett man ok denn` ierdgeschichtlichen äquatorialen Ozean Tethys nöömt! So nu is`t noog mit Physik un de Spöökenkiekerie - wat is nu 2283 passeert?

De Sünn hett Tethys un de annern Häwenskörper orrig inbött`t. Dat güng all 2055 los un höl` bet in de Tokunft an! All Planeten un ehr Manden wieren nu teihn bet twölw Graad heeter! Up`n Iesmaand Tethys stünn nu ok bannig väl Water, wat uns` plietschen Buurdmannschaft ok all mitkrägen hett!

Kaptein Kirk fierte graad sienen föftigsten Gebuurtsdag - he wier all besapen un schlöp` in sien Cabin! Dat wier de Chance för uns spitzuhrigen Vulcanier - Spock gew Lieutenant Uhura nu denn`, Befehl, Buurdarzt, Mc Coy, `n poor Wateremmers, groot Kanister un em sülwst up denn´ Maand Tethys to beamen! Rumps, kuum wieren se mit ehr Kledaschen ünnen, dor bröök dat Ies ünner ehr Fööt! Se rutschten beid mit eenen luuten Schrie in de Deep! As se wedder kloor in se ehr Brägen wieren stuunten se nich schlicht: Een groten See mit Iestappen an de Decke, Riesenlibellen fladderten ümher, Sillberfischchen kröpen mang groten Poggenstöhlen ümher! Fix makten se ehr Emmers un Kanister mit Water vull, as de Buurdarzt von een riesigen Oktopus in denn` See trökt wür. Dor schütt Spock mit sienen Faser nau twüschen de Ogen von denn` Kraken. Dat Diert schrumpte nu up de Grött von een lütten Muus tosamen un dükte in denn` See af. Mc Coy atmete erleichtert up - bannig fix wür allens wedder an Buurd beamt, dat Waterproblem wir nu löst!

De Kaptein, nu wedder nüchtern, runzelte nur de Stirn, oewer Spocks Eigenmächtigkeit, wier oewer letzennlich mit de erfolgrieken Watersöök tofräden. Fix säd Kirk to Scotty: „Geschwindigkeit Warp 2 zum Sternensystem „Zeta Reticuli“. Unsere Freunde dort erwarten uns schon!“

Uwe Schmidt, Niegenbramborg