De Damper „Mudder Schulten“
All siet 1979 führt de Damper „Mudder Schulten“ up denn` malerischen Tollensesee un de Lieps. Dat wi de beiden Seen in Maekelborg-Strelitz hebben, verdanken wi de Weichseliestiet vör ungefihr 14.000 Johren - dormals is een riesigen Iesblock afdäut un hett soans dat Gletscherzungenbecken schafft! De Tollensesee is 11 Kilometers lang un ungefihr 2,5 Kilometers breet un hett eene maximale Deep von 34 Metern. In dissen klooren See sünd ok de allsiets beleewten Maränen antodrapen. Oewer denn` Fischriektum un de Moeglichkeit in den Booken- un Mischwöldern to jagen un in`n Harwst tahlrieke eßbore Poggenstöhl, to`n Biespill Steenpilze, Maronenrührlinge un Päperlings sammeln to koenen freugten sick för hunnerten Johren all de ollen slawischen Stämme! De Naam Tollense stammt oewrigens von dat slawische Wuurd „Dolenzia“ af, wat so väl as Niederung bedüüdte.
Nu willen wi uns denn` Niegenbramborger Damper mal eens `n bäten genauer ankieken: Dat schmucke, witte Schipp hett insgesamt 121 Sitzplätze. Dorvon sünd 71 Plätze in`n beheizboren un klimatisierten Innenruum un 50 Sitzplätze up dat Sünnendeck. De Buurdgäst` bruuken nich to hungen un dursten - se koenen Koffie un Koken, Ies un een lütten Imbiß un alkoholfriee & alkoholische Getränke to normalen Priesen to sick nähmen. Dat giwwt insgesamt dree Rundfohrten oewer denn` Tollensesee un denn` Flachwatersee Lieps:
-
de lütte Tour mir een Duer von 1,5 Stunnen oewer denn` halwen Tollensesee
-
de middlere Tour mit 2 Stunnen Duer oewer denn` kompletten Tollensesee
-
de grote Tour mit een Duer von 2,5 Stunnen oewer Tollensesee un Lieps
De Anlegestellen sünd in`n Kulturpark (Badehaus), Strandbad Broda, Belvedere, Campingplatz Gatscheck, Klein Nemerow, Bemshöhe un an dat Augustabad. Up Wunsch von de Gäst` ward oewerall anleggt!
Wiederhen giwwt dat ok noch Sonderforten. So koenen Fomilien- un Betriebsfieern mal ganz anners stattfinnen: mit een Rundfohrt in romantischem Flair up denn` Gletscherzungensee un dat mit eenen warmen orrer kollen Bufett un tahlrieken Getränken!
Näben „Mudder Schulten“ liggt dat NSW-Linienschipp „Uns Fritzing“, fröher as „Rethra“ bekannt.
Wecker mit `n Fohrrad ünnerwägens is kann mit dissen Liniendamper eenzelne Stationen, to`n Biespill Alt Rehse besöken un mit sienen Drahtäsel üm denn` restlichen See rümführen!
To`n Schluß kann man faststellen, dat Niegenbramborg mit denn` Tollensesee un de Lieps twee schöne Seen hett, üm dee uns anner Städer in Düütschland benieden!