"Maekelborger Wrukeninpott"
Maekelborger un Pommern, dat sünd Minschen mit `n egensinnigen Humor, oewer mit Sinn för schmackhafte un deftige Spiesen! Man seggt hier: „Äten un Drinken höllt Liew un Seel tosamen“. Ick sülwst heww von miene Grootmudder Elli Zillmann kaken lihrt. Se hett all ehr` Rezepte in`n Kopp hatt; Kakböker harr ick bie ehr nich sehn. Hier nu se ehr Rezept „Maekelborger Wrukeninpott“:
Zutaten:
-
een` groten Stäkrööw (Wruke)
-
een Pund Tüften
-
twee grote Wörteln
-
annerthalw Pund Buukfleesch
-
Solt, Päper, Semp un Bröhpulwer
-
een Lorbeerbladd, `n Twieg Thymian
-
`n bäten Zucker nah Geschmack
-
`n Sprütter Wienessig
-
1 TL Piment
Toierst ward dat Fleesch mit ungefihr annerthalw Liter Water, Lorbeerbladd un Solt fast week kakt. Dunn de Wruke, de Tüften un de twee Wörteln afschälen un in Wörpels schnieden. Dat Lorbeerbladd ut`t Water ruutnähmen un dat Fleesch lütt schnieden. Dit dunn tosamen mit de Wörpels, dat Bröhpulwer, Thymian, Solt un Päper in denn` Pott gäben. Bie lütt` Flamm kaken laten, bet dat Grööntüüg gar is. Zucker, Wienessig, Piment un Semp nah Geschmack in`n Kätel gäben un allens goot dörchrögen. Afschmecken un heet servieren!
To`n Schluß noch `n poor Knackwüst rinschmieten un dorto Roggenbrot äten.
Na denn man goden Apptit, leew Läsers!