De natte Büx`

Dat hett sick so üm nägenteihnhunnertsöbentig todragen: Ick wier dormals een Schooljung` un läwte mit miene Mudder un Grootöllern in Fräland (Maekelborg).

Miene Oma un Opa schnackten väl Platt un hemm` sick sogor üm eenzelne Wüürd` sträden, obwohl se beid` ut Maekelborg- Strelitz (Zwenzow un Mirow) wieren.

Doran süht man, dat Platt nich gliek Platt is!

Na, nu will ick man langsam to de Geschicht kamen: De Winter wier`n jo dunnmals noch weck, Ies un Schnee normal. Up jeden Fall wier de Möhlendiek in Fräland in diss` Johr mit Ies bedeckt. Dat Schlittschohlopen wier ümmer een Vergnögen för jung un oll, un man künn schön an Bullerbessen un Reet rankamen, üm dormit to basteln.

An een Vörmeddag dremmelte ick mienen Grootvadder, Hermann Zillmann,: „Opa wann gehen wir endlich Schilfrohr und Rohrkolben schneiden für meinen Flitzbogen?“ (De Jungs hemm` sick jo schöne Piels ut beiden buugt. De Flitzbagens sülwst hemm` wi ut Wiedenholt makt. Wenn dat noch week wier, löt sick dat goot bögen. Dunn hemm` wi een` 80`er Angelsehn nahmen, dat Holt spannt un farig wier de Bagen!). He säd: „Ick heww hüüt keen Tiet, möt noch inköpen gahn un den Aben inböten“. Ick harr oewer nich locker laten, un so gew he schlütlich nah.

Up`n Möhlendiek stünn all`n bäten Water up dat Ies, wiel dat twee Daag` lang Dauwäder gäben harr.

As wi noog Reet schnäden harr`n, wull`n wi torügg nah Huus. An de Waterkant wier dat Ies all möör. Ick kem noch roewer, oewer mien Opa is mit een` Foot inbraken. Bet an`t Knee wier de Büx` natt. Ick heww mi halw dot lacht, oewer mien Opa fünd dat gor nich so lustig!

Up`n Weg nah Huus vertellte he noch mihrere Lüüd`: „Ick bün inbraken, ick bün inbraken ...“.

To Huus ankamen, müßt he ierstmal een poor Kööm up denn` Schreck drinken. Dat Dunnerwäder von miene Oma kem prompt un ok ick heww orrig mien Fett afkrägen!

In de Tiet dornah, wenn anner Lüüd` bie uns to Besöök wier`n, hett mien Opa sien „Mallür“ to`n Besten gäben, un dat wür` hartlich doroewer lacht.

Uwe Schmidt, Niegenbramborg

Illustration: Uwe Gloede, Maler und Zeichner Insel Poel