De Digedags in de Jammerbucht

Lenzmaand 1920: De Digedags, dee sick middewiel in Maekelborg-Strelitz in de Möhlenstadt Woldegk nedderlaten hebben, krägen nu Lust, mal eens Skandinavien, nau de Jammerbucht in Dänemark, to besöken. Dag wier een goden Fründ von Dr. Hugo Eckener, een Luftschipppionier. Dee hett de Zeppeline mit buugt un künn denn` dree Kobolden allerhand Intressantes oewer siene Luftschäpen vertellen. Vör Korten hett he Dag verspraken mit de Digedags up dat Luftschipp LZ 120 nah Dänemark to fleigen. Coco, de Papagei von de Digedags wier all bannig uprägt, as he Wind von de Saak krägen hett! Digedag fauderte sienen geschwätzigen Vagel besünners väl un vertellte em von denn` putzigen Chow-Chow Buurdhund „Veedol“ - dat wier jo nu wat Besünneres för em! Dorüm freugte sick de plietsche Coco ganz dull up de uprägende Luftfohrt!

Geseggt – gedan, de Vörbereitung von de Luftfohrt güng unverzüglich los: De Digedags köfften orrig Proviant in, nehmen ok een Zelt mit, dat se in de Dünen von de Nuurdsee upbuugen wullen. Nu kem de lang ersehnte Dag von denn` Luftschippstart in`n Junimaand ran. Dr. Eckener luerte all up denn` Helpterbarg bie Woldegk up de dree Digedags un ehren Papagei. He vertellte denn` Digedags dat König Haakon VII von Norwegen ok an Buurd wier – dee wull dunn mit siene Fruu de malerische Feldbarger Seenlandschaft besöken.To siene Ihrung wieren dree norwegische Flaggen hißt. Dat Luftschipp wier an eenen Mast fastbunnen un twee Kierls höllten de Lienen fast, kort dorup stäg dat Königspoor ut. Dat Wäder wier phantastisch - blaager Häwen un lichten Süüdwest Wind, wat wullen de Dwargen un ehr Dokter noch mihr? Dee kladderte as Ierster in de Gondel, dunn de Digedags un to`n Enn de Hund „Veedol“ de luut Coco anbellte. De Vier makten sick dat in ehr Kabinen orrig bequem, güngen dunn to de Führergondel üm denn` Buurdkaptein „Goden Dag“ to seggen. Dee harr all de Motoren anschmäten laten un freugte sick oewer denn´ Besöök von Dr. Eckener un denn` Digedags. Coco künn wedder sienen Schnabel nich hollen un kreihgte Befehle as „Ruder nah linksch“ un ähnlichen Himphamp to de Buurdmannschaft, dee oewerrascht wier. Digedag hett em dunn orrig tosamenschäten un entschulligte sick dunn bie denn` Kaptein. De Chef von dat Luftschipp lachte blots un löd` dunn all siene besünneren Gäst` to een Tass Koffie in. Dunn zeigte he Dr. Eckener un denn` dree Kobolden de Flugroute up een groten Koord. Von`n Helpter Barg süll dat dat wieder oewer Swerin, Lübeck to dat däänsche Halweiland Jütland gahn. De Digedags makten väl Photos von de Ierd ünner ehren Luftschipp as all de Lüchttorm Rubjerg Knude von Lökken updükte. Langsam senkte sick dat Luftschipp af un makte an eenen Mast in Nuurdjütland fast. De Digedags rümten ehren Krims-Krams ruut un verafscheedten sick von Dr. Eckener, de Buurdmannschaft un von Veedol. Dunn söchten se sick eenen geeigneten Platz an de Düne von Lökken ut, wur se ehr Zelt upbuugten. Digedag ielte dunn to`n Strand üm glieks nackt in de Nuurdsee to störten! Dig un Dag wier dat Water noch to kolt, se güngen nur mit de Fööt rin in`t Water un spälten dunn Fedderball an`n Strand. Coco dörfte ümmer de verhaugenen Fedderbälle upsammeln un disse an de beiden Spälers oewergäben. `N bäten later hemm` uns dree Dwargen nu Hunger krägen, dorüm söchten se in`n Küstenwold von Lökken dunn Päperlings. Kiek an, Coco sehg all von baben een groten Poggenstohlhexenring mit oewer hunnert groten Päperlings! Dat Abendäten wier rett`t!

De Digedags un Coco makten sick dat richtig gemötlich un se keeken sick gemeinsam denn` schönen Sünnenünnergang in de Jammerbucht an. Dunn schmiedeten se för denn` Harwst niege Urlaubspläne. Wo dat dunn hengahn süll koenen Ji, leew Plattfrünn`, in vier Maanden in Juug` Amtsblatt läsen!

Uwe Schmidt, Niegenbramborg