De Raven von`n Tower of London

Wenn de Kolkraven von`n „Tower of London“ wegfleigen süllen, ward England un dat Königshuus ünnergahn! Dat seggt een ollen Legend – dorüm warden de plietschen Vagels sogor von een Ravenmeester bewacht un hödt. Soeß Raven un twee tosätzliche Vagels hollen sick in`n Tower up.

Disse stolten Vagels fladdern üm de stuunendenTouristen, dee sick denn` Tower orrig bekieken, ümher. Männigeen von de Raven is so zahm, dat man em oewer denn` Rüggen straken kann!

Nu will`n wie mal kieken, wat dat Internet oewer disse possierlichen Vagels seggt: De Kolkraav (Corvus corax) is een Singvagel ut de Fomilie Ravenvagels un läwt in Kanada, Nuurdamerika un Eurasien. De Raven hebben een Körperlänge von 54 bet 67 cm un een Flüchtenspannwiet von 115 bet 130 cm un sünd somit grötter as een Müüsbussard! De Kolkraav ward bet 1,2 kg schwor un is een Allensfräter. So mag he giern Rägenwörm, Vageleier, Insekten, Früchte, Aas oewer ok Mais un Nahrungsabfälle von uns Minschen fräten. Af un an warden Schnicken un Muscheln söcht un dunn ut grote Hööchd up harte Ünnerlagen fallen laten üm dee uptoknacken!

Dat Gefieder is pechschwart un hett eenen swacken Metallglanz, de Hals is bannig kräftig un de grote Kopp hett eenen starken Schnabel. De Roop von Corvus corax is „kraa“, „rak“, „klong“ orrer „oang“. Doroewer hinaus is ehr Repertoire Kolken, Grunzen, Rülpsen, Knarren un Sirren. Bie middeleuropäischen Raven hett de Minsch mindestens 34 verscheeden Rooptypen utfinnig maakt!

De Kolkraven imitieren giern de Rööp von Kreihen, denn` Balzgesang von Auerhähnen orrer Hunnengebell.

Mit dree Johren koenen sick de Raven fortplanten. Dorto buugen se een Nest in Bööm, Felswänden orrer up Hochspannungsmasten. Dunn turteln de Pärchen, faudern sick gägensietig, bedriewen Gefiederplääg un fleigen dicht an dicht in`n Häwen. Dat Weibchen leggt dunn in`n Februormaand mihrst dree bet soeß Eier. Disse warden dunn bet 42 Daag lang brödt, dunn schlüpfen de blinnen un nackten Küken. De Nestlingstiet bedrägt äbenfalls 42 bet 48 Daag – dunn fleigen de jungschen Kolkraven mihrst Anfang Mai ut. In de frieen Natur warden de Vagels 24 Johren oll, oewer in „Tower of London“ is een Exemplar sogor 44 Johren oll worden!

De Kolkraav wür` as angeblicher Schädling von de Jagd un de Landwirtschaft oewer de Johrhunnerte rücksichtslos verfolgt un inMiddel- un Westeuropa & USA utrott`t. Üm 1940 wier de Deeppunkt oewer in`n Momang giwwt dat weltwied wedder 16 Millionen Individuen.

De Raven un de Mischen verdrägen sick hüüttodaag wedder ganz goot – dat koenen Ji, leew Plattläsers, jo sülwst in`n „Tower of London“ beläwen!

Uwe Schmidt, Niegenbramborg