Niegenbramborg - een Stadt to`n Läwen

Dunnerlüchting, dat möckt doch väl Spooß in Niegenbramborg to läwen! Alleen de grandiose Natur von dat Ennmoränenrebeit, de glaskloore Tollensesee, de schnieke Stadtmuer mit de vier Stadtduren un de välen Wiekhüser laden uns Tietgenossen in, hier to wahnen!

Nu is de Stadt all runne 777 Johren oll; alle Stadtviertel sünd goot mit de Stadtbusflotte to errieken.

De Ollstadt hett `ne runne Form mit de Stadtmuer un Wallanlagen mit ollen Eeken un annern Bööm.

In denn` Wallanlagen stünn in`n Middelöller Water, dormit Feinde von de Stadt disse nich so licht erobern künnen! Een besünneres Schmuckstück von de Innenstadt is de ollihrwürdige Marienkirch. Dee is all 1248 buugt worden, de Hauptaltar wür 1298 dörch denn` Bischop von Havelberg weiht. Von denn` Kirchtorm hett man eenen schönen Panoramablick oewer de 4-Tore-Stadt Niegenbramborg. Hüüttodaag finnen in disse Kirch väle Musikveranstaltungen un Ähnliches statt. Af 2001 wür se nu ok offiziell „Konzertkirche Neubrandenburg“ nöömt.

Dat öllste Stadtdur, dat „Friedländer Tor“ is in de iersten Hälft von`n 14. Johrhunnert erricht`t worden. Dit Dur schützte de Stadt in Richtung Pommern. Besünnerheit: De Zingel is kort vör denn` Dreißigjährigen Krieg buugt worden. He hett de Duranlaag tosätzlich vör Angriepern schützt.

Niegenbramborg hett eenen Bahnhoff, von denn` ut künn man bet to`n Enn von denn` Tweeten Weltkrieg in söß Richtungen führen: Nah Woren (Müritz), Strolsund, Berlin, Stettin, Fräland un Lübeck. Leider müßt dat Gleis nah Woren as Kriegsreparatur för de Sowjetunion afbuugt worden; in de annern Richtungen, uter nah Fräland, kann man oewer ok hüüt wedder führen.

Dat Ärzterepertoire in Niegenbramborg is bannig mannigfaltig von Anästhesist bet Tähnarzt. Dat grote Bonhoefferklinikum in de Oststadt is dat drüttgröttste Krankenhuus von Maekelborg-Vörpommern. Dörch de Mitarbeit von välen utländischen Ärzten ward jeder Patient dor goot versorgt!

Wenn man frische Lucht geneiten will, kann man oewer denn` Kulturpark to denn` Tollensesee gahn. Diss See is nah dat Afdäuen von een riesigen Gletscher vör runn 14.000 Johren entstahn. He hett klores Water, is bet to 64 Meters deep. De See hett twee Toflüsse, de Tollense un de Linde oewer nur denn` Affluß Tollense. Dee geht wieder bet in de Peene un dunn in de Ostsee. Een poor Fischoorden in denn` Tollensesee sünd: Maränen, Schleien, Boors, Plötzen, Hääkt un Zanners. Wenn man een Boot hett, kann man von dor ut goot angeln. Üm denn` malerischen See kann man mit een Fohrrad rümführen orrer mit twee Dampers krüüz un quer fohren. Besünners in`n Harwst lohnt sick ok de Söök von Poggenstöhl an de Waterkanten in denn` Eekenwoold. So `n schönen Steenpilz, Waldchampignons orrer de gälen Päperlings kann man in siene Koek goot verarbeiden! Wenn man grotes Glück hett, kann man sogor Iesvagels, Rohrdommeln orrer Fischaadlers up denn` See bekieken – dee sünd selten in de Maekelborger Seenplatte worden.

Tahlrieke Lokale laden de Niegenbramborgers un ehre Gäst` in, hier intokihren. Ümmerhen is dor dat Äten nich so düer as an de Ostseeküst` orrer in Woren. Orrig Andrang in de Kneipen is ümmer an`n Häwenfohrtsdag. Middewiel ist dat nu een Fieerdag fär de ganze Fomilie – fröher hebben ümmer de Kierls sick orrig eenen antüdelt! Ofteens dat ward an dissen Dag in`n Goorden grillt, wenn dat Wäder goot is.

Apropos Goorden: In insgesamt runn 98 Lüttgoordenvereinen kann man hier fünnig warden! Dunn is woll wat för jedermanns Geschmack dorbie!

To`n Enn kann man faststellen, dat man in de 4-Tore-Stadt oll warden kann!

Uwe Schmidt, Niegenbramborg