Up de Spoor von Dante Alighieri

Eener von de gröttsten Italienischen Dichters wier Dante Alighieri - besünners stäkt bie sien Vermächtnis dat Meisterwark „Die göttliche Kömödie“ hervör!

Dor hett he sick up siene grote Jensietwannerung mit riemelorrigen Gesängen von de Höll` oewer denn` Läuterungsbarg bet in`t Paradies begäben. Ünnerstützung för de Reis dörch dat Jensiets kriggt he von Vergil, een verstorbenen römischen Dichter ut de klassischen Antike. Denn` Häwen dörf Vergil nich besöken dorför giwwt dunn de Diern Beatrice Dante Geleit. Dee is leider väl to fröh storben un wier mit Dante goot befründet! Vergil priest Italien as dat Land, wat sick för de Ordnung von de Natur för de gesamte Welt dorstellt.

Bie denn` Weg dörch de eenzelnen Krinks von de Höll` drapen beid` up denn` Höllenhund Cerberus, dat Ungehüer Minotaurus von Kreta, Luzifer un Scharen von Düüweln. Bekannte Sünder, dee in de Höll` Qualen lieden sünd: Kleopatra, Helena, Achilles, Paris un Tristan. In de ünnersten Höllendeep zermalmt Luzifer mit sienen dree Müülern de Erzverräter Judas, Brutus un Cassius. Dunn stiegen Dante un Vergil up de Ierdoberfläche empor un kamen to denn` Läuterungsbarg. Dat duert gor nich lang, dunn dükt de ierste Engel up. Dunn ward Dante von säumigen Seelen bedrängt, dee von em Fürbitte erflehen. In`n tweeten Krink von`n Läuterungsbarg, wur de Neidischen büßen, lehnen de Büßer an pielen Felswänden as blinne Bettlers. Se ropen alle Hilligen üm Gnade an un spräken ok mit Dante un Vergil. De beiden kamen langsam oewer säker ümmer wieder vöran dor wur de Giezigen, Schlemmer, de Zornigen, de Wollüstigen un wecker weet noch wat büßen möten.

Nahdem Dante mit de Hülp von Apollo denn` Weg to dat Paradies krägen hett, dröppt he up siene Jugendfründin Beatrice, dee mit em dat Lichtmeer von`n Häwen erklimmt. Beatrice entwickelt de neuplatonische Lihr von de Ordnung in`n Weltall un dat Driewen von de Wäsen, dee se up ünnerscheedlichen Wägen to dat Ziel föhren. Dante kiekt sick de Häwensroos von de Seligen an un de doran nedderschwäbenden Engeln. Dunn schweift sien Blick up Maria, dee as de Morgenröte in´n Osten denn´ oewrigen Häwen oewerstrahlt! Schlütlich wennen Beatrice un Dante denn´ Blick to Gott sülwst un de Hillige Bernhard sprääkt sien Gebet. Somit is de anstrengende Reis to Enn!

Uwe Schmidt, Niegenbramborg