Plattdütsch Frünn
Dat niege Fohrrod
von Klaus Pieper, Serrahn-Hof
Ick hew ein oll Fohrrad. Dat wier noch`n „Diamant“.Bettau het dat för mi reicht un in Groten un Ganzen wier `k völlig taufreden.De ganzen Johren güng kum wat doran entwei.Seker:Mal `n niegen Schlauch orrer `ne niege Deck müsst schon sien.Ok moal `ne niege Kett,äwer süß? Dat wär egentlich unkaputtbor.Ne 24 Gangschaltung wier nich nödig.De lütten Hügels de wi bi uns hem,kem ick ok oahn disse Hülp hoch.Un wenn ick doch `n betten kortlüftig wier,künn ick awstiegen un schuben.Ick hew jo Tiet.De Tour de „Apteik“ wull`k ok nich gewinn`.Dunn het äwer min Fru meint:Ick sall mi doch `n nieges halen.Dat wüer sekerlich beter führen.Et wüer ok schicker utseihen.Hütigen Dag`s is dat begäng dat de Lüd mit Gangschaltungen führen.Mien „Diamant“wier ja woll blot`s sonn Rackertüg.Ick men äwer, mi reikt dat partudemang.Üm nu denn Freden to woren,hew ick mi begäuschen lotten.De Plan stünn fast:Et ward `n nieges Fohrrad köfft.Igentwennihr wullten wi uns dorna üm kieken.
Quantswis wier`n wi in `n Kophus.Jungedi wat stünnen dor Fahrrö!Ein hew ick mi greppen un hew mi up denn Saddel sett.Dat wier `n groten Fähler!Unverwohrs kem `ne Verköperin up mi dal.Sei wier orrich wrampig!Sei wier woll dorfür dor tau verhinnern,dat de Lüd mit de Wor in Berührung kamen.Dat Snutenwark seeg ut wie bi de Frugens de nachts in Kiekschapp wieren un ümmer bölkten ick sall se anraupen!Man blots de Swäp har noch fählt!Nu het`s mi dat utdüd dat nich jedverein hier allen`s angrawweln künn.Wull ick ok gornich!Allens.Nur dit ein Rad!Ick müsste jo woll ierst moal prowen!Ick kann de Katz woll nich in`Bütel köpen!Bevör ick betahl müsst ick prowen.Dat güng äwer nich.Wenn dat jedverein daun wüer,wo kämen `s denn hen?
Ick hew markt:Se wier nich dortau instellt wat to verköpen!Se wier dortau dor,to verhinnern dat de Lüd wat köpen!Up jäden Fall wier disse Fru for de Arbeit heil un deil to klaug.Se süllte egentlich in `ne Schaul anfangen.Wenn ein so venynsch anmault ward,het man de Schnut vull.Driwens hew ick denn Laden verlotten.
Hütigen Dag`s is ein jo nich blot`s up een Laden anwiest.Ladens giwt dat jo rieklich.Man brukt nur Pennings hem.Bi veele Lüd fählen de öwer `n betten.
Bian dat Kophus wier`n Fohrradladen.Driwens güng ick denn dor rin.Nu wier ick äwer worschugt!Ick begrep mi `n betten.Kort resolviert hew ick mi nu an so`n jungen Mann wend.“Ick wull giern `n Fohrrad köpen.“Hei wier öwerhaupt nich wrampig!!Mit disse Frag von mi wier hei överlast.Nu har ick dat Kalw in`t Og schlag`n.Hei `düd`te mi nu ut wat se all har`n:Maunten Beiks,Trecking Beiks,All Terrein Beiks,Citti Beiks,BMX Beiks,Schildren Beiks!!Un ick Dussel frog na `n Fohrrad!Ick glöw de jung Mann het gor nich wüßt,wat ick wull.Nu frog hei mi:“Was möchten Sie denn mit dat Fahrrad machen?“Nu kem ick in `ne Bisteri:Wat mokt ein mit `n Fohrrad?Ick wull nu ok nix verkiehrtes seg`n.Ünner Ümstänn giwt dat irgendwelche Perversitäten de ick nich kenn?Ick külpte em an un treck de Schullern na baben.
Nu meinte hei,dor wier `n Maunten Beik mit Doubbelbatted Cro Mo Rahmen,Kenndi lewer V Breks,Deore LX Schalter,Spezialized Compkurbeln,STX Umwerfer,OCR Felgen,,TPI Reifen,Staut Comp Nabe.So schnacken hütigen Dags de Fach lüd!Schimpansenenglisch!!
Up min Frag wotau dat Fohrrad extra `n Umwerfer brukt,het hei mi nich antwurt.Ick denk äwer ick bruk sn`n Tünkram nichWenn `k wull kann `k dat Rad ok allein ümschmieten!
Benaut fragte ick em nu:“Hem Se ok ein mit 2 Rö un Pedalen?“Bullkater!Hei lött mi enfach stoahn.Kurlos hew ick denn Laden verlotten.Wat nu?
Nu wier bi uns Sperrmüll.Bi disse Gelegenheit hew ick mi`n Fohrrad von denn Hümpel daltrocken.Ein mit `n orrigen Saddel!Up de niemodschen Dinger kannst jo nich sitten!Äwer du künnst dine Knöp an Nohrs dormit hobeln!Ick glöw de Lüd de up so`n Saddel sitten,sünd anners bugt as ick!Driwes hew ick denn 20 Euro investiert.Nu führ ick mit `n anner Rad as min „Diamant“.Un allens för 20 Euro!Liekers fählt mi ümmer noch min olle Scheß.Ob woll dit Rad so veel uthölt?Ick glöw dat nich.
Adschüß!