Plattdütsch Frünn
Dat´s ´n“ Geschäft“
von Klaus Pieper, Serrahn-Hof
Bi uns in Dütschland läben wi siehr zivilisiert. Ick glöw, dorin sünn wi uns einig. Disse „Zivilisatschon“ kannst sogor up dat „Stille Örtchen“ erkennen.
Ick hew moal up de Autobahn anhollen. Weil: Ick müsste moal. As ick dat Flag seihen hew, künn ick mi nur wunnerwarken. Ick bünn mi vorkamen, as wier ick up dat Rumschep „Enterprice“. Allens het blinkt un glänzt. Man ward geblend` wenn man nich uppassen det. An de Wand wier `ne Kist mit `n Schlitz.Dor kümmt `n Euro rinner. Schwupps, hest nich seihen, geiht ne Dör up.Denn steihst wedder in `ne Kammer. Wenn `st nu glöwst nu kannst ... i bewohr! De Toilet vertellt nu ierst mit di!“ Sehr geehrter Gast ... „Bullkater! Mi hemm`s al taun Etten inlad. Äwer noch nie nich tau dat utschieden! As ick dissen Schock öwerwunnen har, hew ick mi ümkecken. Disse ganze In Richtung näumt sick „Clean Lux“. Up ein grotes Schild stünn de „Philosophie“ von disse Flag. Ick kem `n lütt beten in `ne Bisterie: In Dütschland het sogor `n Schiethus `ne Philosophie! Wenn dat kein`Zivilisatschon is!
Up dat Schild stünn, wat sick de Erfinners von disse Flag dacht hem. De Lüd sallen sick hier an disse Stell seker fäuhlen. Ick hew noch gor nich wüsst, dat bi dat Pinkeln `ne Gefohr bestoahn det! Wat kann ein` dorbi mallüren? Kannst dorbi awsupen? Kannst di ut Verseihen `n Knoten rinner mocken? Orrer up de Steckdos` zielen? Bi „Clean Lux“ jädenfalls bruck`st kein Bang to hewwen. De Schöttel vertellt di allens un wohrschucht di.
Up dat Schild stünn ok noch wat von „angenehme Atmosphäre“. Ick hew mi `n lütt betten wunnerwarkt. Wenn`s einem dat nu schon kommodig mocken will`n, denn harr`n `s `n poor Liegestäuhl henstellen künnt.Viellicht ok `n Klostein denn du lutschen künnst un de up de Tung zergoahn det. Äwer ne,harr`n se nich. Viellicht möt ick mi moal an disse Firma schrieven denn`. Verbeterungvörschläg sünd ümmer gaut.
An de Wand wier`n Pött anschroben tun rinnerpinkeln. Kein Rünn mier. Dat`s siehr schön, denn de Büxenbein bliewen drög! Sei priesten ok denn „super Service“ an. Dat hett stimmt. Kein ein Minsch wier to seihen. Ick fünn dat siehr gaut. Dat`s nich schön, wenn ein` schon `ne Person üm de Fäut wischen det, bevör man öwerhaupt dornäben mockt het. Mann will ja `n lütt betten sien Rauh hemm. Up jäden Fall vertüdelt sick disse ganz`Aktschon to `ne „harmonische Einheit“! De Gast sall sick up disse Flag to Verlöschung uphollen un nich tau`n verungeniren. Schön wier jo, wenn ein kamen wier un seggt harr: Entspann Du Di nu. Ick holl em Di in de richtig Richtung ... Äwer dat geiht denn doch woll `n betten to wiet!
So kannst denn `n „Wellnesbilewnis“ hewwen för 1 Euro!Wenn dat nix is1
Na` ne Weil wier ick nu farig mit mien „Geschäft“. Nu noch de Göpsen awspölen un nix wie rutte. An dat Waschbecken löp kein Water. Na dat kenn`wi ja. Geiht allens automatisch. Ick also ranner an dat Becken ... nix passiert! Kein Water, nich ein Druppen! Verbisterie. Wo wier de Knoop? Nix to seihen. Viellicht möt ick mi bewägen? Nu bünn ick vör dat Becken hen un her lopen. Glöw man: Kein Water! Nu kem ein anner Kierl in dat „Etablissement“. Weit hei as dat goahn det? Wedder nix. Hei güng so rutte, de olle Drecksög! Hei hett woll ok nich wüsst wie dat Water angeiht. Äwer hei kek mi `n betten fünsch an. Ick weit nich woför hei mi hollen hett. Nu stünn ick wedder dor as Pik 7 up Bahnstieg 8. Dor föhl mi in: Nülich in dat Kiekschapp wier so`n eigenorrig Gehopse to seihen. Dor wier`n Korreaner de sprüng henn un her as wier hei narsch. Dat seeg ut as har hei Immen in`ne Büx orrer Pissaminken! Viellicht wier`t äwer ok ne Krankheit. De arme Minsch! Hei hett mi led dan. Dat ganz Gemalle näumte sick: „Gangnam Steil“ wenn ick mi recht erinner. Dat `s `n Tanz! Ob dit woll de Lösung is för dat Waterproblem? Also hoste ick nu henn un her. Min Angst wier, dat de Männer kamen mit de witt Jack, de up denn Rücken tau mockt ward! Wenn di bi so wat èin süht ist möglich, dat dat nich orrich verstoahn ward. Allens güng äwer gaut. Nix passiert. Sogor dat Water löp noch nich!
Nu kem wedder ein rinner. Hei kek mi an, ick kek em an. Wat geiht nu los? Mi schot dat Blatt. Kort resolviert güng hei an dat Becken und ... dat Water löp los! Mi wier dat scharnierlich! In miene Hiddlichkeit hew ick nich mitkrägen; De ein Flies`up denn Fautboden wier lose! Wenn ein up disse Fliese pedden det, löp dat Water los! Sogor lütt betten warm! Dor kannst di blot`s wunnwerwarken. Förfötsch hew ick mi de Finger awspäult. Driwens denn äwer hier weg von disse Flag! Man gaut dat dat in`ne Nacht wier: Wenig Lüd wieren ünnerwägens. Kennt hett mi ok kein einer.
Up jäden Fall: Siet disses Bilewnis holl ick blots noch in Wald an.