Plattdütsch Frünn
Dat Lewen in`n Paradies
von Felix Stillfried
„Ick bün hier Spreker von de Stadt;
Ick frag de Herrn von`n Magistrat:
Wo lang sall noch des` Wirtschaft wohren?
Sei trecken`t Fell uns äwr`re Ohren,
Un Stür up Stürmöt wi betahlen,
De Wirtschaft sall de Düwel halen!“
De Spreker seggt`t, de Börgers nicken,
De Herrn von`n Rat, de ward`n so kieken,
De Herr Burmeister ward so brun,
Blast up sick as en Pagelun,
Kloppt up den Disch un fängt nu an,
Wat hei de Stadt hett Gaudes dan.
„Sie sollten“, seggt hei, „doch bedenken,
Was alles ich der Stadt tät schenken!
Da ist zunächst die Hohe Schul`…“
„Ja“, röppt de Spreker, ok nich ful,
„Wo wi de Dusenden verbu`t!
Na, staatsch naug süht dat Ding nu ut,
Dat brukt uns wieder nich tau quälen,
Man schad`, dat uns de Schäulers fehlen!“
De Börgers nicken: So is`t recht,
Den hest du gaud de Wohrheit seggt!
„Zum anderen sei hier nur genannt,
Wie manniglich ja ist bekannt,
Die Gasanstalt.“ – „Ja“, röppt de Spreker,
wi all! Doch dat is seker,
Wi deden ok vördem in`n Düstern
In unse Straten nich verbistern,
Un güng wi ok nich jüst so rasch,
Uns` Geld behöll wi in de Tasch!“
De Börgers nicken: So is`t recht,
Den hest du gaud de Wohrheit seggt!“
„Zum dritten, wenn ich`s überlege,
Nenn` ich die Straßen und die Wege,
Die Bürgersteige auch vor allem,
Mit hübschen Klinkern abgelegt…“
„Ja dat is wohr!“ de Spreker seggt,
„De Klinkers känt uns woll gefallen!
Doch vördem up den breiden Stein
Brök wi uns ok nich aw de Bein,
Un de kem viertel nich so dür
Un kost`t kein Uplag un kein Stür!“
De Börgers nicken: So is`t recht,
Den hest du gaud de Wohrheit seggt!
„Un endlich darf ich hier wohl nennen
Als mein Verdienst die Eisenbahn.
Viermal des Tages hält sie hier an,
Viermal des Tages also können,
Wohin`s beliebt uns in der Welt,
Wir reisen jetz für wenig Geld.
Mit einem Wort, ich sage dies:
Wir leben wie im Paradies!“
„Ja“, fängt de Spreker wedder an,
Indem dat hei wat segen will,
Dunn röppt so`n ollen Börgersmann
Von achter her: „Ne, nu swig still,
Des` Sak, de weit ick ganz genau!
Herr Börgermeister, hür`n S` mal tau!
Sei segg`n wi lew`n in`n Paradies?
Dormit vertell`n Sei uns nicks Nie`s.
Nu ward wi`t äwerst ok gewohr,
As`t in de Biwel heit, dat dor
De Lüd`, sünd west ganz blot un nakt,
Denn dortau hewwen Sei uns makt!“
De Börgers nicken: So is`t recht,
Den hest du gaud de Wohrheit seggt!