De Verafschiedung
Wi as Kirchgemeind Bülow hemm schon lang wüsst, dat uns Paster in Rente geiht.
An Sünndach Quasimodogeniti wier dat so wiet. Hochrangige Gäst, öber ok Lüd, de süss nich so oft in Gottesdienst tau seihn sünd, wiern kam. De öllst evangelische Kirche in Norddütschland steiht ja in Bristow. Disse Kirch wier bät up den letzten Platz besett. Jedes Mal, wenn de Orgel mit den Posaunenchor tausam ein Lied spälten, wier dat, as wenn de Melodien Flügel kregen, so gewaltig klüng dat.
Dunn wür de Paster von Kirchgemeinderat un Propst Fey inne Kirch führt.
Paster Holmer har sik för sin Prädigt Gen.32de Verse 23-33 rutsöcht. De Minschen domals hemm ok schon för ehren Vördeil bedragen, lagen un sogor Lüd dotmakt. Öber uns Herrgott hett ümmer ein Utwech funn, üm de Lüd wedder up den rechten Wech tau bringen un dat is bät hüt so bläben. Na dat Prädigtlied : Stern auf den ich schaue …, vertellte Propst Fey uns den Werdegang von unsen Paster : geburn in Meckelborg-Schaul in Brandenburg-Studium in Dresden- 1983- also vör 40 Johr, inne Bristower Kirch ordiniert. De Propst sprök sinen Dank ut för de verantwurtungsvulle Arbeit in de vierich Johr un nehm ehm nu de dienstlichen Pflichten af.Dorna geef hei unsen Paster noch den kirchlichen Sägen. Noch einmal erklüngen Orgel und Chor tau dat letzte Lied.
Na de Abkünigungen un Fürbitten wull Graf Bassewitz noch ein poor Wür an de Kirchgemeinde un an Paster Holmer richten. De Graf sülbst is 1945 in de Bristower Kirch noch döfft worn, bevör hei mit sin Öllern dat Gaut verlaten müsst. Na de Wenn hett hei väl tau Erhollung vonne Kirch bidragen. Öber ok de Kirchgemeind hett ehren Paster eine hübsch gestaltete Schriftrull öberreicht.
In Bülow künn wi uns denn ein bäten vernüchtern un hemm noch interessante Gespräche führt. De Konfimanden har noch gaude Sprüche prat un ok gaude Ratschläg makten de Rund.
Ik wünschte mi, dat wi noch lang so eine Gemeinschaft un raup juch tau: Hollt juch fuchtig!