Kita „Storchennest“ Großen Luckow, Dat wier ne schöne Tiet

In Juli 2023 ward de Kita „Storchennest“ in Groten Luckow tau makt. Dreiuntwindig Johr hett de Verein „Dorf miteinander“ Dahmen e.V. de Kita bedräben. Na so langer Tiet entspräkt dat Gebäude nich mihr de bulichen Vörschriften för disse Inrichtung. För mi geiht eine schöne Tiet tau End. Teihn Johr bünn ik wöchentlich na de Kita führt, üm mit de Kinner de plattdütsche Sprak tau äuben. Schad wier dat man, dat de Groten ja denn ümmer bald inne Schaul kem. Trotzdem hemm wi ok mit unse lütten plattdütschen Programme välen Minschen Freud bröcht.

Jedet Mal hemm wi sung, danzt un natürlich för de Schaul äuwt. Besünners talentierte Kinner hemm ok up de Veeh-Harfe Lieder spält. Natürlich is de Spaß bit Lihrn ok nich tau kort kam. Taun Bispill: In ein Bütel lägen verschiedene Dinge un Diere. Ahn tau Kieken müssten de Kinner in den Bütel griepen, fäuhlen un seggen, wat se gräpen hemm.Taun Bispill: Dat is ein Frosch!

Orrer bi ein Krokodil müsste man de Tähn runnerdrücken, öber manchmal schnappte dat tau- manch ein Kind har nich nauch Maut dortau.

Wenn ik morgens inne Kita kem, stünn oft schon de ganz lütten Setters vör mi un wulln mi wat vertelln. Denn heff ik ehr begäuscht, dat wi späder tausam finn.

Bit letzte Mal har ik min groten Bliestift mitbröcht, na,de wür ja bestaunt!

As denn Anton, ein Schaulanfänger, dormit ein blitzsauberes A schräf, wier min Freud grot. Ja, üm de Schaulanfänger bruken wi uns kein Sorgen tau maken.

Ik segg „Adschüß“, villicht drapen wi uns ja mal!

A. Brinckmann-de Plattdütsch-Oma