Fasching inne Kita
Wier dat ne Freud, de Kinner dürften sik wedder verkleeden: Piraten, Cowboys Hexen un ok ein Düwel sprüngen freudig dörch den Ruum.
Tauierst stellten sik alle Kinner taun Stauhldanz up. Solang de Musik spälte, löp allet ruhig af, öber as de Musik uphürte, müsste sik jeder ein frien Stauhl säuken. Ein Dänzer bleef öbrig un müsste utscheiden. As ierster müsste de Bodderlicker ut de Reich gahn un de Enttäuschung wier grot un grote Krokodielstranen löpen öber ehre Backen.Öber süss güng de Groten sihr rücksichtsvull mit de Lütten üm.
Als nächstes kem dat Gespenst inne Mitt von den Ruum tau sitten, denn Luna so wier ehr Nam, har Geburtsdach. Alle Kinner süng dat Geburtsdachlied un gratolierten ehr un wiel sei söss Johr olt wier, wür sei sössmal inne Hööcht bört.
Ruhiger güng dat denn bit Wettäten von Minischokoküsse tau. Mancheiner har sik dat woll einfacher dacht, öber de Hänn müssten up den Rücken blieben!
As nächtes kem de Luftballondanz int Spill, öber man markte schon, dat“de Luft rut wier“ un de ganz Lütten harn sik intwischen ok schon anner Beschäftigung söcht. Dat Wäder wier gaut un de Kinner wulln ok noch mal na buten un anschließend geef dat Pizza taun Meddach. Dat wier doch ein kommodigen Dach för de Kinner.
Nächste Woch is wedder Lihrn anseggt, bet dorhen blieft schön gesund!