Volkssolidarität - Ortsgruppe Schorssow, De niege friee Dach

De Volkssolidaritätsgrupp Schorssow har taun Frugensdach ne lütte Fier organisiert, öber ditmal bleef Hedis Stauhl leer. Wunnerschöne Blaumgestecke un Servietten mit ein Öberraschung för jede Fru schmückten de Dische. De Bedüdung von dissen Dach wür uns ditmal up plattdütsch verklort - wunnerbor. Bäten späder künn wi uns denn ok testen, wieväl wi noch öber de Frugensbewägung wüssten.

Öber denn träckte ein leiflicher Kaffeeduft in uns Näsen un wi künn endlich den leckeren Kauken präuben. Bi passliche Gespräche un Vörläsen von Läbensweisheiten kem ok de Gedanke up, wie schön dat doch is, dat uns Grupp schon so lang ahn Vörsitter besteiht. Frugens, de allein läben, warn öfter anraupen, wi erinnern an Termine, wi halen sei af,went na utwarts geiht, denn uns Motto is - gemeinsam statt einsam!

Ja, un ein Heileit(Highlight) an dissen Nahmeddach wiern noch Max un Paul, twei Musikschäuler, de uns mit schönen Melodien erfreuten. Max bröchte uns up sin Melodika den Frühling tau Gehür un Paul spälte schon flotte Dänze - weck Frugens wippten sogor schon mit - ierst recht, as hei ne Taugaf spälte.

Mit väl Bifall un gaude Wünsche würn de Musiker verafschied.

Went am schönsten sall man gahn un mit uns hübsche Rose makten wi uns up den Wech.

Ortsgruppe der Volkssolidarität Schorssow