Churchill - de Adelige mit de Zigarr
Uwe Schmidt, privat, Churchilldenkmal London
Winston Churchill is een von de bedüüdensten Politikers von`n 20. Johrhunnert! Vör runn 150 Johren is he as Sproß von een Aristokratenfomilie up uns` Welt kamen.
Besünners in Erinnerung blewen siene bemerkenswierte Zitate un legendäre Gesten as britischen Premierminister.
Sien Vadder wier de angesehene Torypolitiker Lord Randolph Churchill, een Nachfahr von`n iersten Duke of Marlborough. Siene Mudder, Jennie Jerome, stammte ut een wohlhabenden amerikanischen Fomilie.
Mit de School harr dat Churchill nich so dull - he bleew mihrfach sitten! Later kem he in de Offiziersakademie Sandhurst. Twüschen 1895 un 1901 nehm he as Offizier an fief Kolonialkriegen von dat britische Empire deel. Dunn is he in Südafrika 1899 as Kriegsberichterstatter infungen un inspunnt worden. Doch em gelang de spektakuläre Flucht un Churchill kihrte as Held nah Großbritannien torügg!
Dunn güng he in de Politik, toierst in de Konservativen Partei, späder in de Liberalen Partei, wur he wichtige Ämter oewernehm. Nahdem 1915 de Dardanellen-Feldzug, denn` Churchill in de Gäng bröcht hett, scheitert is, wür` he ut de Regierung drängt!
1924 tred he wedder in de Konservativen Partei in un wür to`n Schatzkanzler ernennt. Richtig in Fohrt kem he wedder nahdem Hitler mit Nazidüütschland de westlichen Alliierten angräpen hett!
In dissen extremen Krise formte Churchill dat Schicksal mit siene entschlossenen Führung un Räden, dee de britische Moral stärkten. He säd an`n 13. Maimaand 1940: „Ich habe nichts zu bieten als Blut, Mühsal, Tränen und Schweiß!“
As unerbittlichen Gägner von`n Nationalsozialismus föhrte he Großbritannien dörch een von de düstersten Stunnen von`n Krieg. Sien Maut un dat Dörchhollvermoegen makten em to een Symbol von`n Wedderstand gägen Hitlerdüütschland.
Siene engen Beziehungen mit de USA bröchten de Bildung von de „Großen Allianz“. Churchill wier mit Roosevelt un Sowjetführer Joseph Stalin Oberbefehlshaber von de Alliierten.
To sien Markenteiken gehürten een Zigarr in sien Mund un dat Siegesteiken “V“ för Victory. Af Sommer 1941 makte he de Geste för Frieheit un Demokratie bie fast allen Upträden.
In een Rääd in`n Lenzmaand 1946 in Fulton (USA) analysierte he de tonähmende Spaltung twüschen denn` Westen un de Sowjetunion mit denn` prägenden Begrääp „Eiserner Vorhang“. Dormit hett de „Kalte Krieg“ anfungen, dee ierst 1991 beenn`t wür.
1953 wür he adelt un he bekem denn` „Nobelpreis für Literatur“ för siene Memoiren un historischen Warken, dorünner dat sößbännige Book „The Second World War“.
Sir Winston Churchill is an`n 24. Januarmaand 1965 in`n Öller von 91 Johren storben.
De Senner BBC wählte em 2002 in een Ümfraag to denn` gröttsten Briten von de Geschicht` - dat is woll wohr!
Uwe Schmidt. Niegenbramborg