Kultur- und Heimatverein e. V., "Wie sag ich ´s meinem Kinde?“

Ein Upklärungsgespräch von Mann tau Mann up Platt

(Frei nach einer Skizze von W. Häberer)

Bevör wi de Geschichte von Walter Häberer hür´n, mücht ick, as Verteller, Sei fragen, ob Sei ok in dei Schaul Biologie hatt hebben? Ick mücht giern weiten, ob Sei upklärt worden sünd. Ick mein in Saken „Sex“, as man up Niedütsch secht. Weckern „Sex“ all ´n Fremdwurt is, denn´ fragen wi up Plattdütsch: Woer för Sei dat Märken, wat Oma von ´n Klapperstorch vertellt hett, richtig stellt? Kann ja oewer ok sien, dat sik bi Sei de Lihrer üm dat „swore“ Thema rümdrückt hett. Tau DDR-Tieden brukte man in Saken Upklärung blot in dat „Magzin“ bi Professor Doktor Schwabe naläsen.

Un ick? - Mien Öllern hebben woll dacht: „De Jung is up ´n Dörpen mang all dat Veihtüch upwussen, dor hett hei dat woll mitkrägen.“

Nee, ick bün ierst in mien Lihrtiet upklärt worden. Gliek in de iersten vierteihn Daach.. Uns´ Heimleiter säd: “Jungs, ihr wisst gewiss, woher die Kinder kommen. Also aufpassen! Wenn ihr euch mit Mädchen einlasst, dann denkt immer daran, dass das Mädchen unter Umständen die Mutter eurer Kinder sein wird - und ob ihr das wollt. - Richtet euch also danach!“

Farig wier hei. Wi hebben uns ankäken, hebben woll ok scheif grient, oewer wi hebben mindestens ahnt, woans hei dat meint hett.

Hüt hebben de jungen Lüd ehr digitale Technik, as Handy, Tablet orrer Laptop dat sünd, un dor daun sei sick sülbst upklären.

So, Sei sünd nu von mi „upklärt“ worden un nu fangt de Geschicht an. - Recht forsch seggt Mudder Wittsch tau ehrn Mann: “Wenn du dat nich makst, mütten wi dat de Lihrerin oewerlaten. Dat is höchste Tiet, dat uns´ Hansi mal richtich upklärt ward.“.

„Ach, wat sall dat mit de Lihrerin“, meint Vadder Witt, „dat Meiste hebben em doch de groten Jungs all vertellt. - Un kiek, Mudder, in ´t Fernsehen bringen sei doch ok namiddachs all wat von ´t Kinnerkriegen un von Verhütungsmoeglichkeiten un von Antibabypillen. Glöwst du, dat uns Hansi dor denn wechkieken deed? Nülich heff ick taufällich hürt, as Heiner Lenz denn lütten Nawersjungen verklorte, woans Babys makt warden. Un dat hett uns´ Hansi ok mithürt. Ick för mienen Deil denk, dat uns´ Jung genauch upklärt is.“

„Nee, nee Vadder, ick sech di, du müsst schleunigst bi unsen Jung wat gradbögen, sünst ward hei noch total verschandelt“, makt Mudder Witten ehren Mann scharp. „Ick heff all bäten rümhorcht. Up de Bio-Lehrerin kannst di nich verlaten. De makt doch ´n groten Bagen üm de ganze Geschicht. - Ick mein, för mi wier dat ok nicks. - De Lihrerin för Biologie snackt nu all wochenlang oewer de Vermehrung von Wörm, von Spinnen un Fischen. Dorüm hett sei bi de Kinner doch all denn Ökelnamen Frau Wörm krägen. De Kinner hebben bi ehr sogor Poggen ut´nanner snäden - seziert heit dat ja woll. Dor künnen sick de Schäulers de Dierten von binnen ankieken. Oewer von de Minschen un de Vermehrung is noch kein Wurt fallen.“

„Ach, dat kümmt gewiss noch“, versöcht Vadder Witt sein Frau tau beswichtigen, „hüt geiht dat in de Schaul ümmer vom Niederen taum Höheren. Sei hett dat Thema gewiss up ehren Plan. Uterdem heff ick nülich in de Zeitung wat von Sexualkunde läst un denn gifft dat sowat ok. Mak di man kein Sorgen, dat du ens kein Enkel kriegen dest.“

„Nee, so langen können wi nich täuben“, trumpfte Frau Witt up.

„Ja, ja, is ja gaut! Stottert Vadder Witt, „ick gah ja all hen. - Ick mücht blot mal weiten, woför de Lihrers oewerhaupt betahlt warden.“

Vadder Witt slarpte los un an de Dör von sienen Jungen horkte hei un güng denn ´rin. An se Dör bleef hei stahn un seech grad noch, dat de Jung fix den Laptop tauklappte. Vadder Witt frachte gliek, wat de Jung sick ankäken harr.

„Ach, nicks Besonderes“, säd de Jung un klaptte denn Laptop werrer up. Vadder kreeg dat Slucken. Blot bunte Biller von Kierlslüd un Frugens un all harrns nicks an. - As Vadder Witt sick werrer funnen harr, meint hei: „Ick seih, du kennst di ut! Na, du büst ja ok olt nauch, dat du nich mihr an de Geschicht von´ Adebor glöben müsst.“

„So is dat, Vadder!“

Dormit wier all dat Nödige von dat wichtige Upklärungsgespräch von Mann tau Mann fix un ahn väl Würder lopen. Vadder Witt harr denn unangenähmen Gang na de Lihrerin sport un künn nu ok sien Frau upklären.

Aus dem Nachlass von Heinz Kägebein

(Ausgewählt von Hans Turner)