Wenn de Gemeen Schullen måkt - orrer dat Matthäus-Prinzip
Kenn´ S dat Matthäus-Prinzip? Dat geiht so: Wenn een Geld orrer Erfolg hett, denn kümmt ümmer mihr dortau un wenn een nix mihr hett, denn nähm´s ok dat lütt Bäten weg, wat noch dor is.
Bi de Finanzen in uns Dörp is dat grad so. Ümmer mihr Ämters, de Schaul un de Kinnergorden verlang´n ümmer mihr Geld, dormit se ehr Arbeit gaut måken. De Utgaven warden ümmer hoeger. Æwer woans kann dat angeihn? Woher sall all dat Geld kåmen? De Gemeen ward ümmer klammer un so manch een Burmeester möt all Kredit bi de Sporkass´ upnähm´n, üm de högeren Afgaven tau betåhlen. Nix blifft oewer för dat Miteenanner in´t Dörp. Wo künn dat angeihn, dat de Kommün mit Jack und Büx bankrott gohn? Sall´n wi nu ok noch de Stüer vör de Hun´n und för de Hüser hoeger setten? Mösst de Börger an ´t End´ all dat betohlen?
De groten Pullitikers räden in disse Tied ümmer von de Millarden, dat man düsig in Kopp ward un wenn in´e Kommün dat Licht utgeiht, warden de Börger as Wähler ümmer missmaudiger un gnarrig. Dat will ok keinein giern hemm. Orrer seihn S´ dat anners?