Plattdütscher Stammdisch bi „Bürger für Schwaan“
An 15. Januar - Hartung or Iesmaand - Dunnersdag, pünktlich Klock half söben wier dat wedder eins so wiet. Wi sedden dat iehrste Mol in dit Johr in uns Begegnungsstätt` in de Möhlenstraat, an unsen plattdütschen Stammdisch. Ditmol hemm wi Rückblick hollen up dat letzt Johr un wi hemm bi de Kült budden bi Gleuwien setten un up dat niege Johr anstött.
Vornweg hemm wi awer up unsen Fründ Heiko anstött. He is 70 Johr olt worden un kein ein kann em dat anseihn. Un in Kopp is he ok noch richtig klor un noch richtig aktiv för unse Stadt un de Malerie in uns Kunstmöhl.
Achter an hett sick denn de Stammdisch bi de Initiatoren von unse Rund bedankt, för de veelen schönen Stunden an den Disch. Ick kunn dat awer gor nich verstahn, denn ohn unse Stammdischplattschnackers wür gor nix gahn. Also seggen wi hier mal Dank an all de de ümmer an unsen Disch kummen un mit uns platt schnacken. Wi freugen uns up een schönes Johr mit veele schöne Abende.
Dorför hemm wi denn Ideen sammelt un jederein hett wat in de Rund schmedden. Ob Kutschfohrt oder Warnowlöper, tosammen grillen or mit Heiko dorch de Stadt lopen (ok achter den Markt), Film öwer 775 Johr Schwaan ankieken or ok nur vertellen…..wi mödden nu ierst mol sortieren un bedden Klaug rinbringen in dat niege Johr.
Un denn hemm wi richtig schön sungen, to Gleuwien un Gebäck, so wier ok disse Abend an unsen Stammdisch fix vörbi.
Uns next Stammdisch is denn an 26. Februar (Hornung), Dunnersdag half söben. Denn willen wi Witze vertellen…de noch kein ein nich kennt.
Wenn ji nu niegirig sied, denn kümmt einfach vörbi, to unsen plattdütschen Stammdisch.
Hold juch fuchtig