Plattdeutscher Stammtisch

An Dunnersdag den 20.04.23 hem wi wedder eins uns „Plattdütschen Stammdisch afhollen. 18 Lüd wiern in de Begegnungsstätt von „Bürger für Schwaan“ kamen um to vertellen, över „Dit und dat ut Dörp und Stadt“, denn dat wier uns Thema för dissen Abend. Los güng dat mit den “Pastor sein Kau“ und dat Gedicht „Pierhandel“ von Rudolf Tarnow. Nu harren wi ok glick wat to schnacken … Wi vertellten över de Kutschers und Fuhrwarksbetriebe in Schwaan, vun Hans Heiden, Büsing, Frahm und väle andere. Und wat früher allens mit den Pierwagen führt wühr. Kahlen, Bio-Melk, Kurn, Heu und Stroh, Lehm und, und, und ... Dat Kurn würd iehrst up den Acker hockt und denn noch an Acker in Dreschkasten schmedden. Nach Hus güng dat denn baben up den Ledderwagen. Und veele Lüd hem ok noch Veih faudert. Häunrers, Karnickel, Swien, Käu und ok Nutrias gew dat in Schwaan und de Wischen an Warnow und Beke wieren afmeid. Hier und da kem ok de Slachter in`t Hus to`Swienslachten. Ja dat wier noch Nachhaltigkeit. Dat nächst Mol sind wi wedder an 15.Juni 2023 tosammen (is ok wedder een Dunnersdag).

Ort: Begegnungsstätte „Bürger für Schwaan“, Mühlenstrasse 3

Denn sall dat över Kinners und Kinnerspäle gahn, de wi in unse Kinnertied spält hem. Dunn gew dat ja noch kein Computers und spält würd up de Straat, in de Wuischen oder in Wald.

Hol juch fuchtig und bliwt gesund.

Ilona und Korl