Neues vom Plattdeutschen Stammtisch
39. Plattdütsche Stammdisch bi „Bürger für Schwaan“
An Dunnersdag, dat wier an 23. April (Ostermaand), Klock half söben, dor hemm wi wedder an uns plattdütschen Stammdisch sedden un uns över all de wichtigen Dinge,
de in Schwaan so passiert sind, unnerhollen. Un dor gew dat veel to vertellen.
Awer as ierstes mössten wi noch an uns Marianning erinnern. Se wier von Anfang an dorbie, an uns plattdütschen Stammdisch und harr ok immer wat to vertellen. Se hett ja ok oddich wat belewt in ehr fast 92 Johr, de se denn nu doch nich schafft hett.
Wi warden uns giern an Marianne Molenda erinnern.
Und nu güng dat wi ümmer los mit „Nieget ut Schwaan“.
In Lindenbruch wier mal wedder Theater und dat wier schön, hemm de Lüd secht.
Uns Bürgermeister sein Nahfolger hett sick dor vörstellt. Ja, den warden de Schwaaners bestimmt wählen, de is ut Schwaan und kümmt gaud an.
Achteran kemen wi denn tau uns Thema för dissen Abend: „Oma`s Köck – olle Rezepte“. Dat güng los mit „Snuten un Poten“ un „Himmel un Ierd“, „Lungenwurst mit Peppernußsoß`“ und Mählklütt – Plummen mit Klüten. Ganz besonder gaud för lütte und grote Kierls wier „Zuckerei“! Un denn gew dat noch „Brotsupp`“. Nix hemm se früher wegschmedden. Dat olle Brot un de ollen Brötchen hemm se in Wader oder Melk inweickt und mit Zucker upkockt. Dat wier wohl so`n „Arme Lüd Eden“. Un hier is noch dat Rezept för „Mecklenborger Götterspies….Swartbrot ward räben un denn mit Zucker un denn schichtwies mit Sahne un Suerkirschen anricht.
Un gegen den Morgenkater gew dat „Päpperhiering“. Un denn gew dat noch „Rutsch in de Pann“…Eier, Zucker, Appels – awer dat is ut Pommern, dat kennt de Meckelbörger nich. Tscha, „Wecke sick nich an gaud Eden freugen kann, de hett an nix ne Freud!“
Un denn kem de Öwerraschung – een Kaukenform ut Blech mit Deckel babenup.
Den hett uns Fründin Karin Schlundt mitbröcht – un dor wier ok een Kauken in. Awer nee, kein Kauken, dat wier `ne Mehlspiels` - „Groden Klump“. De seh ut as so`n Pottkauken un dor hemm`s frühger inne Mitt `ne half Eierschal mit Köhm, in de Mitt in`t Lock moggt und dat hem` se anzünd`t. Dat gew dat denn mit Swiensback or karamelisierten Zucker or mit Backobstsupp (Plummensupp). `n Kauken wier`t nich, denn dat wier ne Mehlspies un de würd nich backt sondern de würd 2 Stunden in kochendes Waderbad stellt (de Pott). Wat is da nu in? Bodder, Milk, Smalt, Zucker, Rosinen, Mehl, Eier un lütt beten Solt, smeckt wunnerbor, as so`n Pudding – wier noch warm, denn jederein hett `n Stück kregen. – Ick heff twei eden – nich so locker as een Topfkauken, awer hett lecker smeckt und moggt satt.
To`n Schluss hemm wi satt un tofreden dat Leed von „Pastor sien Kauh“ sungen.
To`n drinken sünd wi gor nich kamen, dat willen wi denn in Harwst nahhalen, denn sind ok uns beid Spezialisten dorbi un de Likör is denn ok all fardig.
Wat wi dat next Mal moggen weiten wi noch nich genau, denn wi willen nämlich in Wonnemaand Mai mit den „Warnowlöper“ up de Warnow schippern. Awer wi hemm ja all Whats App. Un wegge niegierig is, de fröcht einfach bi „Bürger für Schwaan“ in de Möhlenstraat.
Bis dorhin - hold juch fuchtig