Plattdeutscher Stammtisch bei „Bürger für Schwaan“
Hallo, leiwe Fründ von uns plattdütsche Sprak.
Ja, so fix vergeiht de Tied, denn nu wieren schon wedder eins veer Woken um und wi seden an uns plattdütsch Stammdisch in`t Schwaaner Bürgerhus in de Möhlenstraat.
Los ging dat glick mit een Leed, denn een von uns harr Geburtsdag hat.
„Sü sa harr ick mol n Lütten“ hem wi sungen und ji ward nich glöben schon gewt `n Lütten.
Achteran hem wi denn över unsen Besök in`t Barlach Theater in Güstrow schnackt, denn dorhin wullen wi twei Dag later führen. „Mit `n Klick to`n Glück“ gew dat vun de Niederdütsche Bühn ut Wismar.
Wat giwt dat Nieges – wat se ok allens moggen willen, de „Verein Krasemannscher Hof“. Bootsverleih, Kutter an Land wo denn Kaffe und Koken verköfft ward, Stand up paddeln – awer wo uns Kinnings baden können inne Warnow dat kunn kein ein nich seggen. De Badeanstalt gewt dat mal. Awer dor is nich miehr väl to seihn und in Sandgorden, dor sallen de Schwaaner nich rin. Wegge sall dor noch Klaug rin kriegen.
Wi wieren denn ümmer an de Böhm`s an Ufer und denn vun baben in`t Wader oder mit`n Strick. Niege Wahlen, niege Politikers, niege Projekte (Füerwehr, Sporthall) – kieken wi mal wat dor rut kümmt.
An 21. Junmaand sall ja nun de Radweg vun Schwaan nah Ziesendörp fardig sien. Denn kann man mit Fahrrad ganz fix und sicher de 8 Kilometers führen, is ok gaud, wieldess Ziesendörp wassen det, to lopen is ja man ok lütt beden wiet – oder man is in uns Wandergrupp.
Und denn kemen wi endlich to uns Thema: „Ut miene Kinnertied“
Hier güng dat ok hin und her, nix wier utloten. Wat is een „Miegensack“?
Und de Sport in Schwaan, de Fautballers – de hemm nach`n Fautballspäl ümmer sopen, ut`n Stäbel, und Waderball gewt dat in de Badeanstalt und een Kraug wier dor ok. Up`t Dörp hem de Kinners in de Tongruben bad`t……und, und, und….
Denn güng dat noch dorum, wat jedereins för een Ökelnamen in seine Kinnertied hat harr, und dat wier lustig – awer dat is nich för de Öffentlichkeit.
Wenn ji miehr weiten willt, denn kümmt vörbi, to uns nächsten Stammdisch bi „Bürger für Schwaan“ in de Möhlenstraat.
Dat next Mol is uns Stammdisch an 27.06.2024 – is ok een Dunnersdag Klock half söben.