29. plattdütscher Stammdisch bi „Bürger für Schwaan“
An 15. Mai(Wonnemaand), ok wedder an een Dunnersdag, pünktlich Klock half söben, wier dat wedder so wiet, wi seten wedder an unsen Stammdisch in de Möhlenstraat und hemm wedder eins nägenmalklaug plattdütsch philosophiert. Ditmol wier angrillen ansecht. Grillt het uns Gerdchen buten und eten hem wi denn binnen, denn dat wier Schietweder. Los güng dat mit dat Leed von „Pastor sein Kauh“ und weil dat vörnweg to`n grillen ok `n Lütten gew, hemm wi achteran glieck noch „Harr ick mol n Lütten“ sungen. Und denn güng dat los, mit unse grot Frag: „Wat givt dat Nieges in Schwaan?“
- Ja, bi den „Schwatten“ Netto in de Doberaner Straat hems nu Kameras anbugt. Nu können de Anwohners ehr Autos dor ok nich parken. So as wi bi Edeka, warden de Lüd nu ok noch up dissen Parkplatz afkassiert. Bi Netto köfft denn von de Anwohners wohl kein ein miehr in, wenn he ihrst eins betohlt hett. Ob de Stadtvertreters in ehr Sitzungen över disse Ort von „Raubrittertum“ in Schwaan ok schnacken? Se sallen ja de Bürgerinteressen vertreten.
Dat wier doch een Thema in dit Johr…..
- Und denn wier ja ganz hoger Besöck in Schwaan, denn uns Ministerpräsidentin Manuela Schwesig wier in Campus. Künnten wi ja so ok all in`t letzte Amtsblatt lesen. So ganz bekannt wier dat nich, ick heff väle Lüd sproken, de hemm dat gor nich wüsst. Na, bi`n Kaiser harr`n de Lüd früher Spalier stahn.
Wier dat nu all Wahlkampf oder einfach nur „Streicheleinheiten“ für Bürgers und Politikers. Na, uns Koordinatorin von Campus hett sick ja denn ok bi de Staatskanzlei für de gaude Zusammenarbeit bedankt. Ja, se weit doch wat sick gehürt….(bi mi hett se dat noch nie moggt.)
Achter dit kemen wi denn to uns Thema von dissen Abend - „Plattdütsche Redewendungen“ und von de giwt dat ja männich nauch. Wi harren bit in de Nacht klönen künnt – und dat wier wedder mal eins so schöööön!
To`n End hemm wi noch „Danz up de Deel“ und „Dat Du mien Leevsten bist“ sungen und denn wier Schluss, mit unsen 29. Stammdisch.
Uns 30. Plattdütsche Stammdisch is an 12. Juni (Brachmaand) - ok een Dunnersdag Klock half söben (18.30 Uhr) wedder in uns Begegnungsstätt` in de Möhlenstraat.
Heiko Brunner will denn eins wedder mit uns dörch Schwaan lopen und uns de Stadt verkloren, so wie dat anno dunnemals wier, as de Minschen noch kein Internet und keine KI harren.
Also, wenn ji nu wedder lütt beten nigiegierig sied, denn kummt vörbi!
An 12. Juni, Klock half söben, bi Bürgers für Schwaan!
Bis denn dann, hold juch fuchtig