Plattdeutscher Stammdisch bi „Bürger für Schwaan“
An 12. Juni (Brachmaand) – wedder eins een Dunnersdag, pünktlich Klock half söben (18.30 Uhr) sedden wi wedder in uns Begegnungsstätt` in de Möhlenstraat und hemm unsen plattdütschen Stammdisch afhollen. Ja, wi harren wedder veel to beschnacken, an dissen Abend.
Vörnwech, uns Warning`s (Ilona und Körling) harren Gülden Hochtied und so hemm wi se ierst orrich gratuliert und hochläben lodden. Se kregten `ne Festansprach und ok enen Frettkorv und Blomen gev dat ok und denn gewt dat noch een Foto. Wieldess ehr Leiv so grot is, hemm wi denn „Dat du min Leevsten büst“ sungen. Eenen utgäben willen se denn bi uns nexten Stammdisch.
Denn kemen wi endlich to uns Thema: Wat gift dat Nieges in Schwaan?
Und wat gift dat Schöneres up de Welt, as to klönen?
| - | Wat is mit de Tankstell? Keine Shopware miehr da - sall ja nu een niegen Pächter hemm, denn löpt sich allens wedder torecht. |
| - | Bi de „Börse“ ward nu bugt…nu ward se afrädden, bloss de Fassade blift wohl stahn. De hemm se stabilisiert, vörn mit Balkens und binnen mit Beton. Nu geiht woll voran. |
| - | De Laden neben unsen Klockenschauster moggt nu wohl ok bald dicht. |
Denn gift dat inne Marktgegend nich miehr väle Geschäfte…awer de
„Mecklenburger Hof“, de höllt dörch!
In uns olle DDR-Zeitschrift „Eulenspiegel“ gift dat `ne Rubrik „Wat macht eigentlich….? …und dorbi is uns de olle Schaulgorden achter de Leugenbrück, vörnan von Lindenbrock, rechte Sied in de Kurv, infollen. Dat wier ja wohl `ne Streuobstwisch oder sowat. Jedenfalls, de Schaul bzw. de Liehrers moggen wohl kein Schaulgordenunterricht miehr und so passiert dor wohl so gut as gor nix miehr. Wiso vergedd de Schaul ehre Projekt so fix? …oder sind de Müs all?
Nu, in Sommer sieht dat awer gor nich miehr so leeg ut, De Wisch is beden hoch wassen, awer de Lüd seggen….
Dat glicke passiert wohl mit den Skulpturenpark achter de „Kunstmöhl“. Nee, nich ganz…Bi de Eröffnung, ick glöw dat wier 2016, dor wier sogar Funk und Fernsehen dorbi und in Winter, dor wier von all den Glanz und Gloria nich miehr väl to seihn. Dat is wohl doch een Anlegen för de Kunstmöhl, dat ok de Skulpturenpark dem künstlerischen Anspruch von unse Stadt gerecht ward. Sünst künnen dor ja ok Oppen und Uhlen stahn. Und jetzt, to`n Summer, dor hett de Stadt den Park wedder schön afmeiht und de Skulpturen, de stahn recht oddich, achter uns Kunstmöhl. Ja, dat to erhollen, dat kost….Arbeit.
Ja, und denn kemen wi noch tau dat leidige Thema „Fußgängerüberweg“ an Markt.
Von de Warnowbrück bis an de „Kunstmöhl“ gift dat een einzigen davon und de is an de Stell, wo em kein ein bruckt. Dat wier woll een „Schildbürgerstreich“ oder de dat moggt hemm, de hemm bloss kein Ahnung. Wegge twischen 16 und 18 Uhr över uns Haupstraad will, möd mächtig uppassen oder he riskiert hupen und „Stinkefinger“.
Ja, in Schwaan gift dat immer wat to vertellen…Ehrenamtsball wier ok und de wier gelungen, im Campus. Hett de Gäst wohl siehr gefallen, vor allem dat Büffet, denn dat wier achter de iehrste Rund all ratzekahl.
De nexte „Goldene Herzen“ – Ball is denn in 3 Johr und wi freuen uns schon hüt.
Uns next Stammdisch is denn an 24.Juli (Gewiddermaand), wi ümmer Dunnersdag Klock half söben in uns Begegnungsstätt und denn willen wi wohl lütt bedden fiern. … und to vertellen gift dat bis dorhin wohl einiges, ut uns schönes Schwaan.
Hold juch fuchtig