31. Plattdütscher Stammdisch bi „Bürger für Schwaan“
An 24.Juli (Gewiddermaand) – wedder eins een Dunnersdag, pünktlich Klock half söben sedden wi wedder in uns Begegnungsstätt` in de Möhlenstraat an unsen plattdütschen Stammdisch.
Vörnwech harren wi Besök, un de künn kein platt nich, awer wi sünd ja nette Lüd und wi hemm uns anhürt wat he will ... in`t next Johr, dor ward in Wiendörp fiert und dor willen se `n Film moggen und kein ein schnackt dor platt – so wiet is dat all kummen … und nu sökken`se Lüd, de in de Wiendörper Kark wat up platt seggen künnen.
Bi Köster Klickermann wier dat nich passiert, dunnemals hemms noch den Katechismus liehrt und allens harr seine Ordnung.
Apropos Ordnung! De hett dat hier bi uns in Dütschland spätestens siet Willem Vogt, dat wier de Hauptmann von Köpenick. Und so is dat ok mit de Streuobstwisch an Lindenbrookvon uns Schaul. Ick hev een Nachricht kreegen vun uns Schaulliehrers und de hemm uns verklort, wieldess de Wisch wegen de Insekten und Bodenbrüters ierst af Juli meiht warden dörf, süht se denn bis dorhen eben so ut as se utsüht. De Äppels von de Bööms, nee, de warden ok nich klaut, wi in dat Leed von de Plattfööt. Nee de warden plückt und denn ward Most moggt för de Kinnings. Ja, so hett allens siene Ordnung bi uns in Schwaan…. und de Bekwischen up de anne Siet, de meiht ja ok kein ein und dat stürt ok nich.
Dormit wieren wi denn schon bi uns Thema: Wat gift dat Nieges in Schwaan?
In November hemm wi in Schwaan de Bürgermeisterwahl und de Linke will wohl een niegen Bürgermeister und hett ja ok een Kandidaten funnen.
He wier all in Campus und hett sich vörstellt und grillt hett he an de Warnowbrück or Picknik moggt… und wat seggen unse Damens dortau? „De Welt is een Comedienhus und jeder spält sin Rull!“ Ob dat `ne Hauptroll or `ne Nebenroll ward, dat entscheiden denn de Schwaaners bi de Wahl. Oh je, bi de letzten Wahl mößten wi 3 mal tellen.
De Stadtvertreters hemm sich mit den Haushalt von uns Stadt beschäftigt und dat is nich so einfach. To Hus kickst du in `t Portemonei und weitst wat du di leisten kannst, awer inne Stadt, dor gift dat veel to bedenken. Se willen so veel bugen und dat ward düer.
Und denn hemm wi noch schnackt över de Überlegenheit der sozialistischen Landwirtschaft in real exestierenden Sozialismus in uns olle DDR. Wenn dat nich so drurich wier, harren wi noch miehr lacht, awer hulen wullen wi ok nich.
Ja, so wier ok disse lustigeAbend fix vörbi.
Uns next Stanndisch is denn an 21. August (Austmaand), ok een Dunnersdag Abend, Klock half söben (18.30 Uhr), in uns Begegnungsstätt in de Möhlenstraat.
Denn willen wi uns unnerhollen över`n Urlaub und de schönsten oder ok nich so schönen Urlaubserlebnisse.
Bis dorhen -
Hold juch fuchtig