Uns (Jabel´sch) Glockenklang

Uns Kirchenglock, de lüert so schön,

Klock söß, för twei Minuten

un wenn dat wedder sowiet is,

denn stah ick giern dor buten

un luer up denn Glockenschlach.

Ick seih denn Kirchturm, öwer, ach,

de Wind steiht, dat is wichtig,

hüt leider in de falsche Richtung,

ick hüer de Glock nich richtig.

De Glock de een, ´t wiern eis vier, dunn drei

un späder har de Kirch noch twei,

spält uns en schönet ollet Leed

un giwt mi dormit Tauversichten,

dat´t doch noch ümmer wieder geiht.

Wat künnen Kirch un Glock berichten.

De grote Brand to Reuters Tieden

mök Jabel dunnmals ganz to Nichten

un ok uns Kirch mit Glockenturm

die wiren dörch denn Füerstorm

henwech, doch Gott sie Dank

sünd´s wedder upbuhcht, Kirch mit Turm

un ´w hüern denn kloren Glockenklang.

Ok Kriege hier up unse Welt,

dor harn se sicher wat vertellt,

de hem ´s dörchmaken möst

un twei Mal is de Glockenturm

för Kriechswarktüch un Munition

al ahn sein Glocken west.

Dit süll man niemals mihr passiern

doch möt ick mi sihr oft verfiern,

hüer ick so manche Minschen,

as deden´s sick Kriech wünschen.

Na, morgen Abend üm Klock söß

vertruhch ick noch eis up dat Währer,

denn stah ick abermals hier buten

un hüer mien Glock wol dit Mal bärer.

Un na dat schöne Glockenlüern,

ick hüer dat jedet Mal so giern,

kihrt Fierabend- Freden in.

Ick glöw, dat is wol ok de Sinn!

Norbert Schröder, Damerow