Hirtenblasen an Hilligabend

Dat is 'ne wohrhaftige Begäbenheit. Hirtenblasen an Hilligabend wier - ok in Roewel - gaude Traditschon. Dei Kauhhirten leepen mit Latücht un Huurn dörch dei Stadt. Sei bimmelten bie dei Lüd anne Dör un födderten ehrn Obolus. Poor Dalers un 'ne Buddel Schluck wier ehr Lohn. 1881 oewer keem allens ganz anners. Dei Schandarmerie harr 'n niegen Wachtmeister krägen. Un dei wull sien Meriten woll ierst verdeinen - partu an'n Wihnachtsabend in Roewel.

Ahn Larm güng't nich af, wenn dei Hirten sick von Hus tau Hus dörchklingelten. Mit väl Krakeel würn Dalers un Koem entgägennahmen. Un schurig tut'e dat Huurn. Hilligabend oewer is ja woll mihr 'n Dach för Inkihr un Besinnlichkeit. Dei Kirchgang steiht an. Dat Christkind sien Geburt makt froh.

Dei Radau stürte Schandarm Stüdemann. Recht un Gesetz stünnen för em in Roewel baben an. Un dei wiern, so meinte hei, in Gefohr, wenn dei Hirten dörch den'n Urt larmten un pracherten. Hei fraachte nich sien Vörgesetzten, wat hei dorgägen ünnernähmen süll. „Sülfst is dei Wachmann“, säd hei sick, verbeid'te dat Blasen un den'n Ümtoch glieks mit.

Sowat harr't in Roewel betlang nich gäben. Dei Ümtoch vonne Hirten hüürte an'n Hilligabend mit tau. Denn wat reepen sei an jede Dör noch ut? „Die Hirten des Feldes verkündigen die Geburt des Herrn.“ Wenn dat nich christlich un anstännig sien süll. Wat woll süss? Un dei Dalers stünnen ehr ümmerhen ok tau. Ganz Roewel wier in hellsche Uprägung geraden. Börgermeister Hermes müßt ran. Noch an'n sülwigen Abend stünnen dei Tuters bie em up dei Matt. Hermes sett'te sick ok glieks mit von Zülow, Stüdemann sienen Baas, in't Benähmen. Un dei schreef an'n Olljohrsabend 'ne Entschulligung trööch.

Lang' noch hemm' dei Roewelschen oewer dissen Vörgang räd. Dei Tuters stünnen nu ierst recht hoch in't Anseihn un wiern bet 1962 inne Gäng. Hüt lopen poor Muskanten an'n Hilligabend dörch dei Stadt un erinnern an dei Traditschon von 1824 bet 1962. Sei sünd von Harten willkamen.

Detlev Kunter