Meister Lampe bitt sick dörch



von Detlev Kunter

Dei Hand in't Füer leggen mücht ick nich dorför, ob dei Osterhas villicht nich doch all Subventschonen ut Brüssel krägen hett. Anspruch harr hei, denn ick glööf, dat sien Konkurrenz - Feldhasen, Muckerhasen, Beddhasen - schofel mit em ümgeiht.

Dorüm födder ick Politik un Wirtschaft - binah harr ick schräben: Partei un Regierung - up, em nich oewer dei Kling springen tau laten. Hei sall Gras fräten un nich all in't Gras bieten. Denn Ostern ahn Ostereier wier man grad so as Upschwung Ost ahn bläuhende Landschaften.

Hentau kümmt, dat Jäger un Drieber em inne letzten Johren mächtig up'n Pelz rückt sünd. Dei poor, dei sei nalaten hemm', schlackern vör Angst all mit'e Uhrn. Ut'n Osterhas is'n Angsthas worrn.

Ick kann dat noch mit 'n anner Bispill begrünnen. Den'n Wihnachtsmann schüddeln w' alle Johr dei Hand. Hei krüzt nich blots in'n Dezember männigmal unsen Wech. Oewer den'n Osterhas kriegen w' nie nich tau Gesicht. Wenn ick an'n Ostern upstahn bün, is hei all dor wäst. Hett woll ok dormit tau daun, dat'n bie em nich bäden möt. Hei gifft sick bescheiden.

Väl wieder bün ick nu noch nich kamen bie mien Säuken na Subventschonen. Wer weit, in weckern schwatten Kanal sei inleit' worrn sünd. Hülp is nödig. Dat sünd w' em schullig. Also warr ick sülfst lostüffeln un Sponsoren utfinnig maken. Ick denk mal, dei Osterwader-Produzent künn wat rutrücken. Sien Laden löppt gaud. Dat Osterglocken-Geschäft dörfte äbenso wat biestüern. Un na dei Osterinseln anklingeln, wier ok 'ne Moeglichkeit. Versäuken kann'n dat ja mal.

Languhr, Matten, Mümmelmann un wo sei all' heiten in ehr „Hasenherz GmbH“, Ji warrn ganz grot rutkamen. Man blots so kolt dörft dat nich blieben. Wenn Sei an'n Ostersünndachmorgen nicks as Eierrühr in't Nest vörfinnen warrn, hett dei Osterhas sienen grippalen Infekt nich bet tau Enn' utkurieren künnt.