Plattdeutsches Wort 2024

Leiw Plattdüütsche,

leiw Frünn von de nedderdüütsche Sprak,

leiw Lüüd,

nu all taum 19. Mal säuken dat Fritz-Reuter-Literaturmuseum Stemhagen un de Heimatverband Meckelnborg-Vörpommern dat schönste plattdüütsche Wurt von dat Johr.

„Jedein, de uns‘ plattdüütsche Sprak kennt oder snackt, kann mitmaken, dat schönste plattdüütsche Wurt von dat Johr tau finnen. Wi freuen uns as ümmer äwer vele Bidräg un sünd all nieglich, ut weck Deile von uns‘ Land un viellicht sogor ut’t Utland sick de Lüüd wedder mit dat Säuken befaten“, seggt vull Hapen Martin Buchsteiner, Vörsitter von den Heimatverband Meckelnborg-Vörpommern. „Grad in dat Fritz-Reuter-Johr 2024 is de Upraup för dat schönste plattdüütsche Wurt en ganz grotorrig Begewen. Dat ward för gewiss wunnerschön!“, freut sick Torsten Jahn, Chef von dat Fritz-Reuter-Literaturmuseums in Stemhagen.

Vörschläg koenen, as gewennt, in drei Kategorien makt warden:

1. dat schönste plattdüütsche Wurt
2. de leiwste Redensort oder dat leiwste Sprückwurt
3. de beste aktuelle plattdüütsche Utdruck (’ne nige Schöpfung sotauseggen)

Ok junge Lüüd in uns‘ Land sallen Plattdüütsch as ehr Sprak estimieren, un dorüm hett dat Fritz-Reuter-Literaturmuseums ’ne sünnerlich moderne Website makt: www.frlm-mv.de. Makt juch den Spaß un gaht mal dorhen!

De Heimatverband Meckelnborg-Vörpommern e.V. un dat Fritz-Reuter-Literaturmuseum freuen sick äwer ok äwer Ehr Stimm up den Postweg oder mit E-Mail.

För jede Kategorie sall jeder Insender blot ein Bispill gewen. Wenn ein Insender miehrere Würd‘ / Utdrück / Redensorten upschräben hett, nähmen wi gnadenlos blot dat irste in de Reihg! Dat Wurt, Utdruck, Redensort sall nich all vörher utteikent west sien. Informationen dortau giwwt dat up de Websiden von’t Fritz-Reuter-Literaturmuseum und von den Heimatverband MV.

Eine Jury, bild’t von den Heimatverband MV, dat Fritz-Reuter-Literaturmuseum un Fachlüüd för Nedderdüütsch, giwwt dat Urdeil äwer dat schönste plattdüütsche Wurt un de leiwste Redensort.

Nieg is nu dat: För den drüdden Deil (de beste aktuelle plattdüütsche Utdruck, ’ne nige Schöpfung sotauseggen), wählt de Jury fief Insendungen ut, un dor sallen de Lüüd sülwst ehr Stimm afgewen.

Dat geschüht sünnerlich up de Internetsid https://www.frlm-mv.de/wort-des-jahres/ Verkünd’t warden de Siegerwürd an‘n 1. Juni 2024 bi de „Plattdüütschen Weken“ in Stemhagen. De Sieger kriegen en lütten Pries. De Rechtsweg is utschlaten. Letzte Termin is de 31. Lentmand 2024 (31.03.2024).

Hartlich Gröten

Dr. Martin Buchsteiner, Heimatverband Meckelnborg-Vörpommern e.V.

und

Torsten Jahn, Fritz-Reuter-Literaturmuseum Stemhagen