De schönste Johrstied

Jo? Jo! De een secht so, de anner so. För mi het jede Johrstied ehren Reiz. Mok wat ut! Öwer nu is´t Frühjohr dor un ick bün - so as ümmer - begeistert. Nich bloßen de Blaumen bläuhen un dat Gras is frisch gräun, so gräun as dat in denn Rest von´t Johr nich mihr to seihn is un lüchten deiht, ok grad de frischen Blärer an de Büsch un Bööm lüchten so, as dat bloßen in´t Frühjohr to seihn is. Späder sünd´s ok noch schön, öwer grad dit Gräun, dat hem´s bloßen in´t Frühjohr. De Bööm, de bläuhen dunn, de Aaftbööm wunnerbor un mit einen herrlichen Duft, manch anner sünd dor öwerhaupt nich so upfällig. De Wieden sünd ümmer de Iersten un ick stah dor giern eins ünner un spar de Uren wiet, wiet up, denn dor summt un brummt dat al in, wenn ´n denkt, dat möst doch noch väl to kolt för de Insekten sien. Nee, de fleigen dor al. Denn de Schleihdurn, de Säutkirschen, de Plummen un dunn de Beerenbööm un jeder het sienen eegen, ganz speziellen un wunnerboren Duft. Na denn griesen Winter kann ick dor gor nich nauch von kriegen. De Appelbööm lösen se tau ehr Tied af mit ehr rosa bet witte Bläuden un denn sünd de riesigen, staatschen Akazien an de Reich. Manche Johre sünd dese groten, urigen Bööm, ok Robinien nennt, ganz un gor witt. Von baben bet ünnen.

Un denn is de Tierwelt jo ok endlich in vullen Gange. Nich bloßen de Immen, Plüschmörs (Hummeln) un anner Insekten sünd wedder inne Gäng, ok de Vögel sünd wedder "kumplett", wat heiten sall, de öwer Winter wech wieren, sünd ok mitlewiel wedder tröch. All singen un fläuten ´s uns wat üm de Wett. Üm dese Tied möt ick dunn ok oft eins wedder an mien Grotöllern denken. Ok wenn uns dat to ehr Läbenstied ofteins nich so bewusst wüer, de läwten sihr mit, för un dörch de Natur. Duntomalen is uns as Kinner dat nich so bewusst worden, öwer hüt is to marken, wat dor ofteins noch unsinnig kuputt makt wart. Wenn wi as Kinner von de Schaul kehmen, güng dat to Oma un Opa to Mäddach, Oma kokte jo ümmer giern, gaud un rieklich, un Opa wier dun al tröch. Nich von de normalen Olldachsbesorgungen, ok nich, dat hei för sien Veihtüch wat erledigen ded, ne, in´t Frühjohr füng för em ok de Kräutersaison an. Wi harn dorför as Kinner kuhm Intress un Verständnis, öwer hüt, wo ick sülben to de ollen Minschen tellen dau, weit ick, hei het ganz genau wüßt het, wat hei ded! Ganz genau.

Norbert Schröder ut Damerow