Plattdüütsche Wochen in Mäkelborg-Vörpommern

Upraup tau dei 3. Plattdüütschen Wochen von'n 28. Maimånd bet taun 18. Rosenmånd 2023

Dei Heimatverband MV e.V. wennt sik an Krings, Verbänn', Schaulen, Kommünen, Medien un Künstler/innen un all, dei Frünn' von uns plattdüütsche Språk sünd, bi dei 3. Plattdüütschen Wochen (Wäken) mittaumåken. Schirmherrin in dit Johr is wedder dei Lannesmudder Manuela Schwesig.

Schnacken Sei ok Platt?

Wenn, denn måken's mit un posaunen ehr Infäll up lütte un grote Tausåmenkünft as 'n plattdüütsche Läsung, 'n Theoterspill orrer 'n musikalisch Programm ut. Versäuken's, as Gästeföhrer in'n Mesuem orrer in'n Urt up Platt ehr Anliggen tau verkloren, måken's in Apteieken un bi'n Horschnieder Reklåme up Platt.

Hemm's kein Bang, Platt tau schnacken!

Schnacken's einfach mål Platt, up'e Stråt un bi'n Diskaunter, up't Amt un inne Schaul, in't Ollenhus un inne Spälschaul, tau Hus mit Fomilie un Bekannten. Daun wi all tausåmen dat Nödige, dat uns Mudderspråk œwerall lud tau hüren is un språken ward!

Disse Beläwnisse sünd all wiß:

An'n 31. Maimånd finnt dei fieerliche Uptakt mit 'n Vördrach von PD Dr. Klaas Hinrich Ehlers vonne FU Berlin in't Krupp-College Griepswold statt. Disse Vördrach is Deil von'n Fachünnerhollung, dei dei Kring för Nedderdüütsche Språkünnersäukungen in Tausåmenarbeit mit dat Kompetenzzentrum Nedderdüütsch vonne Uni Griepswold un denn Heimatverband MV afhöllt.

An'n 4. Rosenmånd finnt taun 9.Mål dei Plattdüütsche Bäukerdach in'n Botan'schen Gorn vonne Uni Rostock statt. Plattdüütsche Verlage stellen ehr Såken för Grot un Lütt vör, up twei Bühnen gifft dat Ünnerhollungsprogramme, dat plattdüütsche Wurt 2023 ward utposaunt. Organisiert ward disse Bäukerdach von'n Botan'schen Gorn, denn Frünnkring von Botan'schen Gorn, denn Kring „Klönschnack Rostocker 7“ un denn Heimatverband MV.

Von'n 5. bet 10. Rosenmånd finnt in Griepswold dat „Festival up Platt“ mit dat Figurentheoter un anner int'ressante Veranstaltungen satt. Taustännig sünd hierför dei Lannesberband vonne frieen Theoter, dat Soziokuturell Zentrum St. Spiritus, dat Kompetenzentrum Nedderdüütsch un dei Heimataverband MV.

An'n 11. Rosenmånd gifft dat in Döms denn 17. Nuurdüütschen Dach vonne Kunsthandwarker un äbenso dat ein un anner Programm up Platt.

Mit denn „Reuterschen Sünndachsspaziergang“ an'n 18. Rosenmånd gåhn dei Plattdüütschen Wochen 2023 tau Enn'.

Henwies tau Mitmåken finnen's in'n „virtuell Kråmkist“ up'e Websied von'n Heimatverband MV: www.heimatverband-mv.de. Dor finnen's ok dat Logo un Vörlagen för Plakate, Visitenkorten mit wichtige plattdüütsche Wür in'n Olldach un noch anner Såken. In denn „Atlas Nedderdüütsch“ up uns Internetsied finnen's Autoren/innen un Künstler/innen, dei's för plattdüütsche Veranstaltungen inlåden kœnen. Up uns plattdüütsch Sied gifft dat int'ressante Filme, Hürbäuker un Audiobidrääch. Näbenbi bemarkt, dei digitalen Angebote as Vördrääch un Wiederbillungen dörch Videokonfernzen sallen taunähmen un 'n noch gröttere Rull spälen.

Låtens uns taukåmen, wat 's sik vörnåhmen hemm'. Wi setten denn allens up uns Websied „Akschonen un Beläwnisse inne 3. Plattdüütschen Wochen“ in't Nett, dormit all dei bunte plattdüütsche Landkort von MV seihn kœnen.

Plattdüüsch läwt, wenn't ok schnackt ward!

Bi Frågen an'n Heimatverband MV wennen's sik an: Anne-Christin-Boll, Geschäftsführerin, Tel.: 0385 5777 3711, Mail: geschaeftsstelle@heimatverband-mv.de.

Dei Plattdüütschen Wochen kriegen 'n Tauschuss von't Ministerium för Weitenschap, Kultur, Bunnes- un Europaangelägenheiten Mäkelborg-Vörpommern.