Plattdüütsch an de Arfer Grundschool
„Plattdüütsch lesen hett wat“, so de söven Kinner und de Tohörer. Lasse (vürn links) und Merte (vürn rechts) kreegen de meisten Punkte
Arf: „Platt, ik bün dorbi!“, so gult dat vör de Schölers vun de dritte und veerte Klass an de Arfer Grundschool. „Wir wollen in diesem Jahr an allen drei Stapelholmer Grundschulstandorten eigenständige Lesewettbewerbe durchführen“, segge to Beginn op Hochdüütsch de Schoolleiterin Meike Müller-Toledo. Söven Kinner harrn sick meldt und düchtig dat Plattdüütsche övt. Over disse Kinner weern biet Vörlesen nich alleen. De ganze Klass und uck Öllern und Grootöllern weern dorbi und freuten sick op dat Plattdüütsche. De Texte stunn in een Heft, dat vun de Schleswig-Holsteensche Heimatbund ruutgeven is. De Texte „Emil hett dat Been broken“ und „Köönt Apen singen?“ weern bannig beleevt und offens to hörn.
De Heimatbund harr uck een Papier mitleevert, wo de Wertungskommischoon bit Vörlesen dropp to achten harr: a) Lesen köön, b) Utsprook und c) Utdruck.
To de Kommischoon hörsten Frenz Wulff, Max Sprenger und Peter Thomsen. De dree Mannslüüd harrn sick all vörher mit dat Textbook uteensett. Frenz Wulff wiese noch mol dropp henn, dat in dat Book de Würr ton Deel anders avdruckt sind as se bi uns in Stopelholm bruukt ward. Peter Thomsen harr de Hennwies, dat de Schölers vörwech seggn schulln: „Ik kumm ut Arf und bi uns ward dat so utsproken.“ Max Sprenger weer heel begeistert vun de Texte: „De warr ik to Huus mien Enkelkinner vörlesen.“
No över een Stünn harrn de Kinner all vörlest. De Kommischoon truck sick torüch und weer ant Reeknen. Frenz Wulff geev dorno dat Resultoot dörch. „Vörwech muchen wi ju seggen, ju hebbt all flietig övt und wi hebbt uns över ju freut“, so Wulff. Alle Kinner kreegen as Anerkennung vun Frau Müller-Toledo een lüttje Präsent. Lasse Dührsen ut de dritte Klass keem op dat höchste Punktekonto, dorno keem Merte Rahn ut de veerte Klass.
In Februar 2024 geiht dat in de Landschops-Entschedens, in Mai 2024 warrt de Regional-Entscheedens utricht und an de 5. Juni 2024 is de groote Lannes-Entscheed in Niemünster. De ole Schoolmeester Peter Thomsen erinnert sick an fröher torüch: „Tweemol hett de Arfer School de Lannsbesten stelln kunnt.“ Luert wi av, watt komen deit!
Peter Thomsen