Frauenfrühstücksgruppe der Gemeinde Pahlen
De Frauenfrühstücksgrupp vun de Karkengemeende in Pahlen hett am 03.07.2023 een Fohrt no dat Landschafts- un Heimatmuseum in Lunden mookt. Dor hett Fruu Sigrid Schalkalwies geb. Voß uns hartli begrööt. Wi sünd in twee Gruppen opdeihlt worrn un Herr Jensen hett so ok een Grupp döör dat Huus führt.
Jo, wat wi dor allns to höörn un to sehn kreegen. Dat weer gewaltig. In veele Rüüme weern de oolen Gegenstände ünnerbröcht un opstellt.
Dor weer een Melkanloog vun fröher, de Melkschemel weer ok dor. In den annern Ruum, de Schoolruum, stunn de oolen Bänke un op den Disch leegen de Tofeln un de Griffeln.
Webstöhln weern opstellt, oole Huushaltsgeräte z. B. Pannen to´n Futtjes backen, Stuffsuuger vun fröher, veele Radios un Telefone. Veele oole Klocken kunn wi bewunnern un in de medizinische Affdeelung hungen twee Schiller vun Dr. Oskar Freudenthal, Tähndokter ut Dörpling.
In de Textil- un Handarbeitsaffdeelung sehn wi oole Büxen un Hemden vun fröher un veele Muster för dat Häkeln un Lochsticken. Wittsticken worr dor doch to seggt.
Ach, ik kann dat gorni allns optelln, soveel Musterexemplare weern to bewunnern. Mookt sik op de Patten un besöök dat Heimatmuseum in Lunden.
Een Dank för dat Organeseern! Danke för dat Kaffee drinken int „Rad-Café!“.