Cornelius Molitor bei Mundartwettbewerben erfolgreich

Cornelius Molitor, der in Winnweiler aufgewachsen, zur Volksschule und auf das Gymnasium gegangen ist, nimmt seit 2 Jahren an Mundartwettbewerben teil. Nach dem Abitur hat er Winnweiler verlassen (Wehrdienst, Ausbildung, Beruf) und wohnt seit dem in Kaiserslautern.

Mit dem folgenden Beitrag „Dummkopp“ hat er 2022 den Publikumspreis beim bedeutenden Mundartdichterwettbewerb in Bockenheim gewonnen:

Dummkopp

Ich hatt’s net so mit Mathe, Physik war ferr mich nix.

In Deitsch, Geschichte un Chemie war ich kää Genie.

Bin grad mit Ach un Krach so dorch die Schulzeit kumm -

doch net, weil ich so faul war: ich bin halt nur zu dumm!

Ich bin e echter Dummkopp, ich bin e echter Depp.

Ich glaab, so ebbes Bleedes wie mich hot’s noch net gebb.

Doch net, dass ehr jetz määne, dass ich mich do schäm -

e Dummkopp so wie ich hot domit kää Problem!

E Dummkopp, der is happy, e Dummkopp, der is froh.

Dass er de Allerschlauschte is, des määnt er sowieso.

’s gebbt nix was er im Lähwe net erreiche kennt -

heit is so mancher Dummkopp Präsident.

E Dummkopp, der is souverän, beherzt un rigoros.

Wo annere noch iwwerlehn, do leht der ähfach los.

Un wann mol ebbes schiefgeht, des nemmt dem kähner krumm -

do saan die Leit: „Ei horch emol - du wääsch doch, der is dumm!“

E Dummkopp is im Vordääl, e Dummkopp, der hot’s gut,

weil er bei allem, was er macht, net ähmo zweifle duht.

Froot nie, ferr was des gut is un froot ah net „warum?“ -

e Dummkopp, der is dodefor zu dumm.

Die Weisheit vun de Mensche un die Intelligenz,

die han nadurgemäß irgendwo e Grenz.

Doch Dummhääd, die is grenzelos un international -

dumme Mensche finnsch du iwweraal.

Es gebbt Millione Dummkepp, vielleicht sogar noch mehr.

Un ich bin froh un glicklich, dass ich dodezu geheer!

De Herrgott liebt die Dumme un gebbt ah uff se acht -

sunscht hett er jo vun denne ah net so viel gemacht.